ANQARA - Hemsereka Pêroyî ya HDPyî Sultan Ozcane da zanayîş ke ê do şexsîyetê tuzel ê HDPyî bipawê û vat: “Ma do tecrubeyê nê têkoşînî û destkewtişê xo biheriknê Partîya Çep a Keske û uca de aver şêrê.” 

 

Partîya Demokratîke ya Şaran (HDP) 4ine Kongreyê Îstîsnayî, Merkezê Bazirganîye yê Cîhanî de pê ard. 94 delegeyî zafane raye şixulna û hemserekê newe yê HDPyî Sultan Ozcan û Cahît Kirkazakî ameyî weçînayîş. 

 

Hemsereka Pêroyî ya newe Sultan Ozcane badê kongreyî ercnayîşê xo yê ewile kerd û da zanayîş ke do şexsîyetê tuzel ê HDPyî bêro pawitiş la wextê neweyî de do heme tecrûbe û dewlemendîyê xo biheriknî Partîya Çep a Keske.

 

‘Ma paştîya xo da tarîxêk bi ristim’ 

 

Sultane dîyar kerd ke tarîxê 11 serran ê HDPyî raywanîya hêvîye de zî tarîx bîyo û no mîrasêk o. Sultane wina dewam kerd: “Na raywanîya hêvîye ya 11 serran de mîrasê tecrubeyê şoriş, tarîx, komel û demokratîke ca girewt. Heme tecrubeyê têkoşînê demokratîke yê gerdunî daya pey xo û rayraşîyayîşêk xurt ke wayîrê ci vejîyeno yo. HDP wexto ke ame awankerdiş bî adresê şaran, bawerîyan awan bi. Vatî ‘do rojan dewam nêkero’ la bi înat heme dînamîkê komelî vera heme kumpas û abluqayan paştîya xo da tarîxî. Bi fikrê cuyêka newe heta roja ewro xo ard. Dewaya girewtiş, dewaya kumpasî yê Kobanê dewam kenê. Nê hewldayîşî û hêrişî vernîya ma nêgirewt. Cuyêka newe, cuyêka cîya, têkoşînê daîmî rayra berd. Heme astengîyê vernîya têkoşînê yewbîyaye derbaz kerd û ame nê rojan. Wezîfeyê ma Fatma Gok, Sebahat Tuncel, Fîgen Yuksekdag, Serpîl Kemalbay û Pervîn Buldane ke girewtî ma do bi îradeyêk azad rayra bibî.” 

 

Do şexsîyetê tuzel bêro pawitiş 

 

Sultane dewamê qiseykerdişê xo de ard ziwan ke babeta ke HDP kerdo HDP çareserîya problemê Kurd ê demokratîk û komara demokratîk, demokrasîya herême ya û wina domna: “Hedefê ma no yo ke peynîya sîstemê zilmkar, polîtîkayê şerî bêra. Hedefê ma awankerdişê cuyêka hempar a şaran a. Coka ra zî ma wextê awankerdişê neweyî de vernîya xo da paradîgmaya xo. Ma ewnîyayî ke kêmanî estê. Ma do nê kêmanîyan temam bikerê, ma do kadroyê xo newe bikerê. Ma do derdan çîyê ke ameyî ciwîyayîş ra bivejnê. Ma do tecrube û destkewtişanê xo biresnê Partîya Çep a Keske û uca de aver şêrê. Ma do şexsîyetê tuzel bipawê û rayîrê xo de bi nê mîsyonî dewam bikerê. Partîya Çep a Keske wextê neweyî de do tarîxî ra dersan bivejna, xobîyayîş bikera û biba adresê hêvîya şaran û qerarê awankerdişê cuyêka newe de ba. Peynîya aşma Êlule de ma do kongreyê xo pê bîyarê û dîyarîya şaranê Tirkîya bikerê. Wa tu kes bê hêvî nêbo. HDP esto, fikrê HDPyî rayîrê neweyan vîneno. Ma do bi bi na bawerîye rayra şêrê.”

 

Sultane tewr peyîn bale ant serê tecrîdî zî û wina qedêna: “Wextê neweyî de rêxistina têkoşînî Partîya Çep a Kesk a. Nameyê xo bedilneno û rayîrê xo de rayra şino. Şikitişê tecrîdê serê Birêz Abdullah Ocalanî sey wezîfeyêk vernîya ma yo. Lazimîyê nê her wextî ra hîna zêde do pê bêrê û no wezîfeyî komel dayo vernîya ma. No xeylê muhîm o.”