AMED - Cinîyan seba mîtîngê 1ê Êlule Roja Aştî ya Dinya do Meydanê Îstasyonî de bêro organîzekerdiş, veng dayî û vatî: "Seba ke ma tewr zêde aştîye rê wayîr vejîyê û polîtîkayê şerê taybetî veng vejê, ma do vejîyê raşteyan. No xeylêk muhîm o. "

 

Bi munasebetê 1ê Êlule Roja Aştîye ya Dinya şar seba ke vejîyo raşteyan û hemverê polîtîkayê şerê taybetî wazenê xo bîyarê ziwan, amadekarî kenê. Bajaranê Kurdistanî de zî bi na çarçewa xebatî yenê rayraberdiş. Do Roja Aştî ya Dinya de Meydanê Îstasyonî yê Amedî de mîting bêro organîzekerdiş. Bi nê munasebetî cinîyê sîyasetmedarî seba mîtîngî do Meydanê Îstasyonî yê Amedî de saete 16.00ine de bêro organîzekerdiş, veng dayî.

 

'Seba ke ma dayîkan rê bibê veng'

 

Verfeka Partîya Çep a Keske ya Amedî Pinar Sakik Tekin, da zanayîş ke do 1ê êlule de azadî biqîrê û wina vat: "Cografyaya Kurdistanî de bi 40 serrî yo şîdet û şer esto. Tewr zêde zî cinî nê travmayê şer û şîdetî ra tesîr benê. Şahid û kerdoxê nê prosesî cinî yê. Însiyatîfê Dayîkanê Aştîye seba na cografya rê aştî bêra, têkoşîn kenê. No têkoşîn zî nê çî paştrast keno. Coka seba ma bibê vengê kênayanê xo, lajê xo, mêrdeyê xo ke nê oxirî de vînî kerdê, ma şarê xo rê vengdayîşê mîtingê 1ê Êlule Roja Aştî ya Dinya kenê."

 

'Ma mecbûr ê hemverê şerî de vengê xo vejê’

 

Parlamentera Partiya Çep a Keske Adalet Kaya, venga tewrbîyayîşê seba mîtingê 1ê Êlule ya Meydanê Îstasyonî kerd û wina vat: "Ganî cinî, ciwanî raşteyê mîtîngî hemverê şerî de helwestêk nîşan bidê. Ma tu cayê cuya xo de şer nêwazenê labelê seba polîtîkaya şîdetî kuçe û keyeyî, her tim şer esto. Coka muhîm o. Ganî her kes raşteyê mîtîngî de bê. Seba ma hêvîya aştîye pîl bikerê, ganî ma şêrê raşteyê mîtîngî."

 

'Seba ma rêxistinbîyayîşê xo nîşan bidê ma şêrê Meydanê Îstasyonî'

 

Parlamentera Partiya Çep a Keske ya Amedî Ceylan Akça Cupolo da zanayîş ke seba rêxistinbîyayîşê xo nîşan bidê, ma şêrê Meydana Îstasyonî û wina vat: "Seserre yo metodêk cuye şarê kurdî ferz kenê. No metodê cuye zî koyanê ma de sey kalekol, kuçanê ma de sey wesayitê zirxî, zîndanan de sey tepişteyê sîyasî vejênê vernîya ma. Seba ma vajê, ma nînan  qebûl nêkenê, ez her kesî dawetê mîtîngê 1ê Êlule yê Meydanê Îstasyonî kena.”