AMED -  MKGP û DFGyî bi wesîleya 1ê Êlule Roja Aştî ya Dinya, rojnamegeranê tepişteyan rê mektûbe şirawitî.

 

Platformê Rojnamegeranê Cinîyan ê Mezopotamyaye (MGKP), Komeleya Rojnamegeran ê Dicle û Firatî (DFG) seba 1ê Êlule Roja Aştî ya Dinya, rojnamegeranê tepişteyan rê mektûbe şirawitî. Mektûbe bi beşdarbîyayîşê rojnamegeran û Parlamentera Partîya Çep a Keske Sevîlay Çeleng ameye şirawitiş. Rojnamegeran mektûbe şirawitî û verê PTTyî de qiseykerdişêk kilm kerdî. Dima ra mektûbê ke ameyî nuştiş, ameyî şirawitiş.

 

‘Îqtîdar destpêk de rojnamegeran hedef gêno’

 

Verfeka Platformê Rojnamegeranê Cinîyan ê Mezopotamyaye ( MKGP) Roza Metîna qisey kerd. Roza dîyar kerd ke 1ê Êlule Roja Aştî ya Dinya de zî rojnamegerî, sîyasetmedar, nuştoxî, pawitoxê heqê merdiman zîndan de yê. Roza wina vat: "Îqtîdar kesê ke tecawuz, desteştiş kenê û kesê ke mafya yê, serbest vera dano. Labelê rojnamegerê pawitişê heqê neqlkerdişê komelî kenê, bi hawayêkê bêhuqûq, bêsûc û sebeb yenê tepiştiş. Welat de heq, huqûq, edalet çinbo, rojnamegerî yenê muhakemekerdiş. Rojnamegerê hemverê bêhuqûqî û bêedaletî xo ver danê, nika zîndan de yê û do 1ê Êlule zîndanan de pêşwazî bikerê. Ma hêvî kenê ke 1ê Êlule biba wesîle ke pêro rojnamegerî azad bê û karê xo bieşkê bikerê. Ma vanê ke rojnamegerî nêeşkenê bêrê muhakemekerdiş, rojnamegerî sûc nîya.”

 

‘Vengê rojnamegeran bi tepişteyan reyde nîno birnayîş’

 

Dimayê Roza Hemserekê Komeleya Rojnemegeranê Dicle û Firatî (DFG) Serdar Altan wina qiseykerd: "Ma do rastî her tim binusê û xêz bikerê. Hevalê ma yê rojnamegerî zîndanan de zî çîyo ke keweno serê milê înan gênê. Vengê rojnamegeran bi destbendkerdişî û tepiştişî nêeşkeno bêro birnayîş. Ma reyna vanê, rojnamegerî nîna muhakemekerdiş.”