WAN - Hemsereka Pêroyî ya HDPyî ya verê Pervîn Bûldan ke serdayîşê dikandaranê Berê Sînorî yê Kapikoyî kerd wina vat: “Ma do nêverdê teda şarê ma rê bêro kerdiş.”

 

Hemsereka Pêroyî ya Partîya Demokratîke ya Şaran (HDP) ya verê Pervîn Bûldan û parlamenterê Partîya Çep a Keske serdayîşê dikandaranê Berê Sînorî yê Kapikoyê qezaya Seravî ya Wanî kerdî. Parlamenterê Partîya Çep a Keske yê Wanî Zulkuf Ûçar tîya de qiseykerdişêk kilm kerd û dîyar kerd ke cografyaya Kurdistanî de serê kurdan de ambargoyêk esto û wina vat: “Tîya tabela de bi erebkî, ingilîzkî, tirkî îqazkerdişî estê la kurdkî çin a. Hemverê kurdkî de tersêk û endîşeyêk esto. Tîya xeylêk problemî estê, ma do taqîb bikerê. Ma do nêzdîbîyayîşê cîya yê hemverê kurd, îranî û tirkan qebûl nêkerê.”

 

'Ma destûr nêdanê cit standardî'

 

Hemsereka Pêroyî ya HDPyî ya verê Pervîn Bûldan zî da zanayîş ke seba problemê welatijan bivînê ameyê tîya û wina vat: “Şarê ma vat ke tîya bi problemê xeylêk pîlî reyde rî bi rî yê. Pêwa ke merdimê hemwelatijanê ma hetê bînî de estê zî wexto ke şinê veyve û sersaxiyan zî problem vejênê. Ma qebûl nêkenê ke ezîyet merdiman rê bêro kerdiş. Ma do destûr nêdê cit standartî û astengiyê ke hemwelatîyê ma yê derbazê Îranî bibê rê bêrê vetiş. Ma do çareserkerdişê nê probleman de bi israr bê. Sewbîna seba derbazbîyayîşê transît virazîyê zî ma do bikewê mîyanê hewldayîşî. Ma soz danê ke ma do qetî nînan rê bibê çareserî.”