MÊRDÎN - Serkan Ozguno ke Midyad de cinîya êzidî Barane Hasan Reşo qetil kerd, 25 serrî cezaya zîndanî amebî birnayîş. Cezaya ke Serkanî rê ameya birnayîş, bi îdiayê “seba bêro zelalkerdiş gelo hişê ci sereyê ey de yo yan nê" hetê Dadgeha Îstînafî ra ame betalkerdiş. ATKyî zî raporê newe amade kerd û vat ke hetê aqilî ra problemê Serkanî çin ê.

 

Keso bi nameyê Serkan Ozgun ke 6ê tebaxa serra 2021ine de dewa Ebşî ya qezaya Midyadê Mêrdînî de cinîya êzidî Barane Hasan Reşo qetil kerd. Dadgeha Cezaya Giran a Midyadî bi sebebê “kiştişê biqesdî”, 25 serrî cezaya zîndanî Serkanî rê birna, vat ke do cezaya ey nêra fînayîş û qerar da ke rewşa ey tepişteyî dewam bikero.

 

Hîrên rotişê dewaya 14ê nîsana 2022yîne de ame organîzekerdiş û hem keye, hem zî avûkatanê Reşo cezaya ameya dayîş kêmî dîyî û vatî: “Cînayet bi hawayêkê plankerde ameyo kerdiş û ganî na ceza bêra betalkerdiş." Seba nê zî Dadgeha Edlîyeyê Herême ya Amedî îtîraz kerd. Avûkatanê Serkan zî bi îdiayê “Hişê ey sereyê ey de nîyo” waştî dosya bêra xirakerdiş û derheqê miwekîlê ey de qerarê “nîno cezakerdiş” bêro dayîş.

 

Pawitişê weşîye ya aqilî ame qebûlkerdiş

 

1ine Daîreyê Cezayan ê Dadgeha Edliyeyî yê Herême ya Amedî çarçewaya waştişê avûkatanê versûcî de qerar da ke qerarê dadgeha herêmî bêro betalkerdiş. Dadgehe dîyar kerd ke serranê 2003, 2004 û 2015ine de nêweşxaneyê cîya de raporê “seba xirabîyayîşê psîkolojî seba leşkerî munasib nîyo" ameyo dayîş û Nêweşxaneyê Bajarî yê Fethî Sekîn ê Xarpêtî de zî raporê “tu problemê yê ci yê mezgî çin o" ameyo dayîş.

 

Îstînafî qerarê xo de dîyar kerd ke mabêne raporan de nakokî esto, îtîrazê avûkatanê versûcî qebûl kerd. Îstînafî seba taqîbkerdişê rewşa versûc û raporê Heyetê  Îhtîsasî, qerar da ke versûcî bişirawê Sazgehê Tipê Edlî (ATK) yê Stenbolî. 

 

'Problemê mezgî yê versûcî çin o'

 

Dadgeha ke qerarê dadgeha herêmî xira kerd, qerar da ke rewşa tepiştişê versûcî dewam bikero. Dimayê nê qerarî, dosya reyna dadgeha herêmî rê ame agêrayîş. Dadgeha herêmî zî seba bêra dîyarkerdiş gelo “aqil û hişê versûcî ca de yo yan nê" qerar da ke bişirawê ATKyê Stenbolî. Roniştişê ewilî ê dosyaye vizêr Dadgeha Cezaya Giran a Midyadî ame kerdiş. Avûkatê her di hetan zî tewrê roniştişî bî û roniştiş de ewraqê newe ameyî wendiş. Raporê ATKyî yê Stenbol de ame vatiş ke “problemê mezgî yê versûcî çin o" û amebi vatiş ke “ceza eşkena ci ra bêra birnayîş."

 

Dimayê pawitişê avûkatanê her di hetan, dadgehe seba amadekerdişê mutalaayî dosya Serdozgerîya Komare rê şirawitî û roniştişê bîn  21ê êlule de yo.