ANQARA - Tepişteyê sîyasî Fîgen Yuksekdag û Gultan Kişanak, mesajê ke konferansê cinîyan rê şirawitî de vatî, "Ma do xo newe bikerê û aver şêrê. Ganî ma bîyarê vîrê xo ke ma senî serkewte bî û ma ça ra senî serberz derbaz bî..."

 

Hemsereka Verê ya Pêroyî ya Partîya Demokratîke ya Şaran (HDP) Fîgen Yuksek Dag û Hemşaredara Bajarê Girdî ya Amedî ke qeyûm tayînê vera ci ame kerdiş Gultan Kişanak zîndan ra seba Konferansê Cinîyan ê Partîya Çep a Keske rê mesaj şirawit.

 

'Ganî ma bîyarê vîr ke ma senî serkewte bî'

 

Mesajê Fîgene û Gultane wina yo: "Cinîyê erjîyayeyî, hemrayê bi qîmet merhaba şima rê. Konferansê ma yê ke rastegehê merkezî yê bi şarî reyde yê, ma înan ra bawer ê ke do bibê berardişê na kede. Ganî ma bizanê ke îradeyê cinîyan û xebatê înan ê kolektîf ke bingehê têkoşînî yê ma qetî xo vîr ra nêkenê û ma do serê nê bingehî de xo newe bikerê û aver şêrê. Ma hemrayê şima yê tepişteyî pêro şert û mercan de kîşte şima de bê. Ganî ma bîyarê vîrê xo ke ma senî serkewte bî û ma ça ra serberz derbaz bî... Bi hêzê cinîya ke nîna astengkerdiş, bi zanayîşê cinsî û îradeyî û bi ruhê şorişê cinî ma do nê neqebê tengî ra serkewte derbaz bibê. Bi heskerdişê hemrayî ma şima silam kenê.