Mîdye Miqted

 

HELEB - Cinîyê êzidî derheqê dayîşê bawerîya êzidîye yê sey dersî ke mekteban de bidîyo de wina vatî: “Bi serran o vera nasname û bawerîya êzidîyan de hêrişêk gird esto. Seba têkoşînê vera nê hêrişan wayîrvejîyayîşê nasname û bawerîya êzidîye muhîm o.”

 

Reya yewine Taxa Şêxmeqsudî yê bajarê Helebî de bawerîya êzidîye sey babetêke fermî mektebanê Xoserîya Demoratîke de do bêro dayîş. 8 mamosteyî tewrê perwerdeyîyê dayîşê bawerîya êzidîye bîyî, perwerdeyîyê înan bi sernameyê dewreyê Şehîd Newroz Zerdeşte 10 rojan de ame dayîş. Mamoste Rocîn Qerendel û mamosteyê bawerîya êzîdîyan ê Yewîya Êzidîyê Helebî, Rewşan Zerdeştî derheqê babete de qisey kerdî.

 

Wazenê şexsê komelê ezidîye de kurdan qir bikerê

 

Mamoste Rocîn Qerendele ke mamsoteyê bawerîya êzidîye ra yew a wina vat: “No bi serran o ferman serê komelê êzidîye ve yeno kerdiş. No zî bi amacê qirkerdiş û çinîkerdişê hemwelatijê êzidîye yo. Wazenê ke şexsê komelê êzidîye de komelê kurd temamî qir û çinî bikerê. No qerar newe ame dayîş ke tutê êzidî û hem zî tutê heme neteweyê bînî taxa Şêxmeqsûd û Eşrefîye de bi hawayêkê fermî bawerîya êzidî bimusî û bî sey bawerîyêk fermî ke do mekteban de bêro dayîş. No gamêk tarîxî yo ke ma da destpêkerdiş. Bi wesîleya Xoserîya Demokratîk, fikir û felsefeya Rayber Abdullah Ocalan o. Bi no hawa ame averberdiş.”

 

No seba ma îmkanêk tarîxî bi

 

Mamoste Rocîne da zanayîş ke seba înan îmkanêk tarîxî bî û wina vat: "Ma seke mamosteyê êzîdî seba ma hêz û moralêk bî ke ma bieşkê bawerîya xo bimusnê pêro kêmneteweyan. Eynî wextî de ma hemverê pêro zîhnîyetê ke wazenê bawerîya êzîdiyan çin bikerê, benê cewab. Venga ma pêro welatijanê Şengalî ra oyo ke tutanê xo derbazê mektebanê Xoserîya Demokratîke bikerê ke ziwanê dayîke bimusê û bawerîya êzîdîyan ra dûr nêkewê."

 

Perwerdeyê seba mamosteyan

 

Serê eynî babete de mamosteya bawerîya êzîdîyan ê Yewîya Êzdiyanê Helebî de, Rewşan Zerdeştî wina vat: "Serê ma de xeylêk fermanî ameyî. Bi amancê qirkerdişê bawerî û komelê xozayî, komelê êzîdîyan bi nê fermanî serê ma de ameyî. La seba ma zî bi çand û ziwanê xo hemverê nê fermanan de bibê cewab ma perwerdeyêk mamosteyê xo reyde da destpêkerdiş ke bawerîya ma seke babetêke fermî mektebê Xoserîya Demokratîke de bêra dayîş û ma hêvîdar ê ke pêro welatijê taxe de pêro na bawerî bimusê. Bi serran o hemverê nasname û bawerîya êzdî hêrişêk pîl esto. Seba têkoşînê hemverê nê hêrişan de wayîrvejîyayîşê nasname û bawerîya êzidîyan muhîm a."