Habîbe Eren 

 

BÛRSA - Komeleya Cinîyan a Kozaye serra 2012yî de Bursaye de ameye awankerdiş. Komele seba cinîyê ke şîdet dîyî têkoşîn dana û hewl dana biba cewabê lazimîyê cinîyan. 

 

Komeleya Cinîyan a Kozaye serra 2012yî de seba paştîdayîşê cinîyan Bursaye de ameye awankerdiş. Komele babeta şîdetê serê cinîyan de paştî dana cinîyan. Goreyê waştişê cinîyan verê înan dîyeno komele, dezgeh û weqfan.  

 

Sereka Komeleye Necla Turemene derheqê falîyetê komeleye de ercnayîş kerd. 

 

Neclaye da zanayîş ke komele hetê komêk cinîyê femînîste ra Bursa de bi waştiş û lazimdîyîşê cinîyan ameye awankerdiş û vat ke babeta îstîhdamkerdişê cinîyê ke ameyî mexdurkerdiş û şîdet bi înan ameyo kerdiş de xebetîyena. Neclaye wina dewam kerd: “Ma serra 2004î de qerarê akerdişê komeleye da û ma serra 2012yî de akerd. Fabrîkaya Tekstîlî ya Taybetî de şewat vejîyabî û ma dima ra qerarê akerdişî da. 5 karkerê cinî yê ke bi vardiya şewe xebetîyayêne peynîya beran de dinyaya xo bedilnayî. Ma Platformê Cinîyan ê Bursaye 8ê Adara 2005î de dîyarîyê cinîyê karkerî kerd. Ma wexto ke Komeleya Cinîyan a Kozaye awan kerd, ma karkerê Kozaye ra îlham  girewt.”

 

‘Ma goreyê lazimîyan benê cewab’

 

Neclaye falîyetê komeleye ercnaye û nê çîyan ard ziwan: “Cinîyan xo resna ma. Zafane cinîyê ke şîdet bi înan ameyo kerdiş û cinîyê ke fek yewbînan ra vera dayî. La raybazan nêzanayêne. Yew serrî de 60-70 cinîyî xo resnenê ma. Ma çarçeweya nimitişî de têgêrenê. Ma goreyê lazimîyan benê cewab. Babeta huqûq, psîkolojî û starbîyayîşî de ma paştî danî.”

 

‘Wextê pandemî û erdlerzî de muracatî zêde bîyî’

 

Neclaye dîyar kerd ke tena prosesê destveradayîşî de nê, her sewîya de zehmetî ancenê û wina vat: "Pandemî de h»mara muracatan zêde bîye. O wext şîdetê camêrdî yê keyeyî zêde bî. Ma erdlerzêk gird ciwîyayî. Cinî her hat ra mexdûr bî. Wextê erdlerzî de zî muracatî zêde bîyî. Goreyê dayeyê fermî nifûsê Bursayî 3 mîlyonî zêdeyêr o. Bi koçberî no hîna zêde bi. Seba bajarê 3 mîlyonî zêdeyêr ganî stargehê cinîyan bêrê akerdiş."

 

‘Ma ŞONIM ra agahî nêgînê'

 

Neclaye peynîya qiseykerdişê xo de dîyar kerd ke şinê ŞONIM û bi nuşteyî zî agahî wazenê la agahî nêgînê û vat, cinîyê ke şîdet vînenê xo resnenê înan yan zî merkezê heqê cinîyan ê baroyan û hetkarîye wazenê.