Nazlican Nûjîn Yildiz

 

WAN - Fabrîqeya Çîmentoye ya Wanî eşteyan erzena Gola Wanî û hewteyê verêne de ajansê ma dîmenê nê caaardişî pare kerdbî. Temsîlkara ÇEVDERî Arzu Dînçere dîyar kerd ke her çend ke Gola Wanî binê pawitişî de biba zî tedbîr nîno girewtiş û vat: “Derheqê eştişê eşteyan de tu tedbîrêk nîno girewtiş û coka ra zî roj bi roje gole ver bi çinîbîyayîşî ra şina.”

 

Fabrîqeya çîmentoye ya 54 serre Artemîtî ya Wanî de falîyetan rayra bena. Heta nika xeylê hetan de bîya sebebê lêşinîya hewayî. Fabrîqeye 134 metre dûrê qeraxîye ameya awankerdiş. Hewteyo verêne de ame dîyîş ke eşteyêyan erzenê gole mîyan. Heto bîn de ame zanayîş ke şaredarîya qeyûmî ke herra binê awe pakî keya qeraxe de verdena.

 

Tehlukeyêk gird awan kena

 

Arzuye da zanayîş ke fabrîkaya çîmentoye 134 metre dûrê gole ya û uca de binpaykerdişê hewa û qeware yeno ciwîyayîş. Arzuye vat ke no zirarêk gird dano Gola Wanî û dewam kerd: “Gola Wanî bi herikîyayîşê kanalîzasyonê 56 hezar metrekupî lêşin bena. Fabrîkaya çîmentoye 1969î de qerax de awan bîya. Çi heyfo ke ganî qerax de nêameybîya awankerdiş. Eynî wext de demê peyênan de ma bi germîya globalî reyde rî bi rî yê. Heme çemê ke Gola Wanî wayîr kenê her ke şinê zuha benê. Raşteyê awe yê dormeyê gole lêşinî û germîya globale vera zuwa benê.”

 

‘Herre vejenê û ca de verdenê’

 

Arzuye sewbîna vat ke qezaya Tuşba ya Wanî de her çend ke parzukerdişê bîyolojîk ê averşîyaye bibo zî lêşinîyêk hezar û 800 lîtrelî esto û wina vat: “Fehmêk seke her roje Gola Wanî ra herre erzenê teber ame awankerdiş. Vatî ke Tuşbaye ra heta Artemîtî 500 metre kareyî de na herre ameya vetiş. La na herre binî ra vejenê û erzenê rayîrê qeraxê Unîversîteye. Çar taxê Tuşbaye de hemwelatijî boye çirawe vera nêeşkenê keyeyê xo de vinderê.”

 

‘Wina şêro do gole biba çirawe’

 

Arzuye ard ziwan ke qanûnê pawitişê Gola Wanî ameyo vetiş û dimayê ci qanûnê binpaykerdişê qeraxî zêde bîyî û herêma Artemîtî de binpaykerdişî hîna zêde bîyî. Arzuye vat ke eke wina dewam bikero germîya globale vera do Gola Wanî biba herre.

 

‘Dimayê qeyûman lêşinî zêde bî’ 

 

Arzuye bale ant serê caardişê qeyûman û da zanayîş ke dimayê qeyûman lêşinî hîna zêde bîyo û derheqê eştişê eşteyan de tu tedbîrêk nîno girewtiş û coka ra zî roj bi roje gole çinî bena.