AMED - Serra 2006î de Parka Koşuyoluye de teqayîş pê ame û teqayîş de 10 kesan dinyaya xo bedilnabî. Her çend ke teqayîş sero ra 17 serrî derbaz bibo zî kerdoxê teqayîşî nêvejîyayî raşte. 

 

Qezaya Rezan ya Amedî de Parka Koşuyoluye de 12ê êlula 2006î de teqayîş qewimîya û netîceyê teqayîşî de 10 kesî dinyaya xo bedilnabî. Tugayê Întîkamê Tirkî qewimîyayîş ra dima hêriş girewt xo ser. Teqayîş de way û birayê yewbînan Abdullah (6 aşme), Nazlican (4) û Nazar Çetînkaya (2) û wayê yewbînan Şîlan (6 aşme), Zîlan (8), Evîn (10), Mizgîn Demîr (12) û dayîka înan Faîde Demîr, Hasan Marangoz (14), Rojhilat Aslan (28) ameyî qetilkerdiş. Bariş Demîro 5 serrî, Maîde Çetînkaya û Alî Haydar Kaplanî zî çaqeyê xo, Emîne Yetîşeceke zî milê xo yê çepî vînî kerdî.

 

Dimayê qetlîyamî esnafê Baglarî dikan girewtî û bi serkêşîya Platformê Demokrasîye yê Amedî Parka Koşuyoluye de çalakîyêk pê ardî. Qetlîyam vera hîrê rojan şîn ame îlankerdiş. 

 

TÎTî girewt xo ser

 

TÎTî dimayê ke qetlîyam girewt xo ser çapemenîya hetgir vat ke PKK qetlîyam pê ardo la TÎTî hedîse girewt xo ser. Dosyayê mabenê Walîtî, Emnîyet û serdozgerîye de ame vînîkerdiş. 

 

Tehqîqatê Ergenekonî de şopê teqayîşî 

 

Operasyonê Ergenekonî ke bi hawayêkê hîra rojeva Tirkîye de ca girewt û hema dimayê ci îdianameyo ke ame amadekerdiş de şopê teqayîşê Parkê Koşuyoluyî de vejîya raşte. Klasorê dekewtişê îdianameyî de klasorêk bi hûmara 243yî yê bi nameyê ‘Dosyayê Amedî’ yê qeydkerde vejîya raşte. Klasoro ke 537 rîpelî ra pê ameyêne de derheqê teqayîşê Amedî de zabitname, nuşte, raporê otopsî, nuşteyê dozgerî, zabitnameyê operasyonî û sewbîna çîyî ca girewtêne. 

 

Tazmînat ame redkerdiş 

 

Seba 10 kesê ke qetlîyam de dinayaya xo bedilnabî û birîndar bîbî, goreyê metodî ‘berpirsîyarîya wezîrîya karê zerre esta’ mabenê 350 hezar û 700 hezarî de muracatê tezmînatî ameyî kerdiş. La wezîrî nê muracatan red kerd. 

 

Qusûrê xizmetî nîno dîyîş! 

 

Mehkemaya Îdarî îdîa kerd ke qusûrê xizmetî ke îdare rê bêro barkerdiş çin o û dewaya ke keyeyan akerdbî red kerd. Keyeyan muracatê Mehkemaya Berzî kerd û 21ê Adara 2012yî de hetê 15ine Daîreye ra bi eynî sebeban ame redkerdiş. Keyeyî nê redkerdişan ra dima 22ê Teşrîna Verêne ya 2013yî de şexsî muracatê Mehkemaya Destûrê Berzî kerd. Mehkemaya Desturê Berzî 20ê Nîsana 2016î de dîyar kerd ke heqê muhakemekerdişê adîlane yê keyeyan ameyo binpaykerdiş û vat ke ganî netîceyê binpaykerdişan bêro wedaritiş û newera dosya bişirawîyo mehkemeya herêmî.

 

Yewine mehkemaya îdarî ya Amedî ke newera muhakemekerdiş kerd, îdîa kerd ke qusûrê xizmetî çin o, vat ke seba her keyeyêk tazmînatê manewî 20 hezar do ca de bibo. 

 

Heto bîn de derheqê hîrê şikinan de 5ine Mehkemaya Cezaya Girane ya Amedî de dewa ameye akerdiş û qerarê roniştişî 17ê Gulana 2012yî de ame dîyîş. Derheqê kerdox Hîkmet Topal û Gurhan Guneşî de her yewî rê 11 reyan cezaya muebetê giran û sewbîna sucê ‘kiştişê kesan ê plankerde’ ra 216 serr û 8 aşme cezaya zîndanî ame dayîş. 

 

Dimayê teqayîşî Parka Koşuyolu de seba vîrardişê 10 kesan hetê Şaredarîya Bajarê Girdî ya Amedî ra serra 2008î de Abîdeya Cuye ame viraştiş.