Dîlan Babat - Melek Avci 

 

ANQARA - Konferansê Meclîsê Cinîyan ê Partîya Çep a Keske de cinîyê sîyasetmedarî bale antî serê tecrîdê hemverî Rayberê PKKyî Abdullah Ocalanî û vatî: "Serdemê neweyî de do hemverê tecrîdî de çalakîyan organîze bikerê û her wareyî de do rêxistinbîyayîşê cinî xurt bikerê." 

 

Meclîsê Cinîyan ê Partîya Çep a Keske Anqara de bi tewrbîyayîşê 400 delegeyan konferansê merkezî bi sloganê "Bi serewedaritiş û rexistine ma azadîye pawenê" 8 û 9ê êlule de Merkezê Kultur û Perwerdeyî yê Odaya Muhendisê Makîneyî (TMMOB) pê ardî. Kombîyayîşê ke di rojan dewam ker de netîcename zî ame eşkerakerdiş. Konferans de cinîyan bale ant serê tecrîdê hemverê Rayberê PKKyî Abdullah Ocalanî, rewşa tepişteyanê nêweşan, kedwerdişê hemverê cinî û mexdurîyetê cinîyan ê herêma erdlerzî. 

 

Cinîyê ke tewrê konferansî bî ajansê ma rê qalê muhtewayê konferansî kerdî û bale antî serê tecrîdê hemverê Abdullah Ocalanî. 

 

‘Bi tecrîdî reyde cinî û komel nêeşkenê nefes bigîrê' 

 

Hemşaredara Silopiya ya Şirnexî Adalet Fîdan, tewrê konferansî bî û dîyar kerd ke herêman de kombîyayîşê cinîyan ameyî organîzekerdiş û cinîyan kombîyayîş de serdemê newe dîyar kerdî. Adalete, wina vat: "Konferans de hem qerarê ke kêm mendê û nîqaşê ke kêmî mendê ameyî ercnayîş. Konferans de bi taybetî ercnayîş serê tecrîdî de ame kerdiş û eynî wextî de ame dîyarkerdiş ke ganî cinî rayberîya nê prosesî bikerê, vejîya vernî. Nika tecrîd vilayê temamê zîndanan bîyo û vilayê temamê komelî bîyo. Bi tecrîdî reyde komel û sere de zî cinî nêeşkenê nefes bigîrê." 

 

Xurtkerdişê rêxistinbîyayîşê cinî

 

Adalete, dîyar kerd ke konferans de sernameyê ke vejîya vernî zî xurtkerdişê rêxistinbîyayîşê xoser ê cinî bî û wina vat: "Xora verê zî  xebatê rêxistinbîyayîşê cinî estbî û munaqeşeyan de vejîya werte ke ganî no rêxistinbîyayîş vejîyo sewîyeya tewr pîl. Xora weçînayîşê herêmî nêzdî benê. Wextê vîyarte de hem weçînayîşê herêmî de û hem zî weçînayîşê pêroyî de Sîstemê Hemserekî ame nîqaşkerdiş. Hemserekî yena a manaya temsîliyetê têduştî û ganî derheqê nê de zî xebatêke xurt bêra kerdiş."

 

Hemverê tecrîdî de çalakî...

 

Adalete, dîyar kerd ke konferans de bi taybetî babeta tecrîdî hemverê Abdullah Ocalanî ame qalkerdiş û wina vat: "Şexsê Birêz Ocalanî de komel pêro binê tecrîdî de yo. Konferans de hemverê tecrîdî de ercnayîşê dewamkerdişê çalakîyan ame kerdiş û ame dîyarkerdiş ke do plansazgehê çalakîyan vejê. Sewbîna ame dîyarkerdiş ke na çalakîya ke bêra kerdiş tenê Kurdistan de nê û sewbîna bi beşdarbîyayîşê pêameyê bînan bêrê organîzekerdiş. Kesê ke pawitişê demokrasî kenê ganî têkoşîn girs bikerê."

 

'Qelsî pratîk de vejîyayî werte' 

 

Endama Komîsyonê Bawerî û Şaran a Partîya Demokratîke ya Şaran (HDP) Songul Tunçdemîr, dîyar kerd ke dimayê weçînayîşê 14ê Gulane herêman de kombîyayîşê şarî ameyî organîzekerdiş û wina vat: "Ma kombîyayîşê xo de bale ant serê rêxistinbîyayîşê cinî û serê kêmî. Bi taybetî ercnayîşan de vejîya werte ke  têkilî bi xocayî ra qels bîyo û do hemverê nê de çi bêro kerdiş. Paradîgmaya partîya ma de qelsî çin a, qelsî pratîk de ya. Ma kombîyayîş û konferansî de xeta têkoşînî ya serdemê newe dîyar kerd. Sewbîna konferansê ma yê cinîyan de babeta sereyîn tecrîd bî û ame dîyarkerdiş ke tecrîd ke Îmraliyî de dest pêkerd, nika  temamê komelî rê vila bîyo. Tesîrê tecrîdî serê çaresernêkerdişê problemê kurdî de tesîr o û serê cinîyan de bi tesîr o. Serdemê newe de hemverê tecrîdî de plansazîyê newe do bêrê vetiş."