STENBOL - Bi sebebê parekerdişê serê medyaya dîjîtale serrêke û 3 aşmî ceza xebatkara rojnameyê Yenî Yaşamî Rojîn Altay rê ameye birnayîş.

 

Xebatkara rojnameyê Yenî Yaşamî Rojîn Altay 28ê çeleyê 2022ine de raşteyê teyareyê Sabîha Gokçen ê Stenbolî amebî destbendkerdiş û dima ra amebî veradayîş. Bi îdiayê “endamîya rêxistine” derheqê Rojîne de dewa ameye akerdiş. Roniştişê ewilî yê dewa 22yîn  Dadgeha Cezaya Giran ya Stenbolî de ame kerdiş. Rojîne tewrê roniştişî nêbî û avûkatê aye Ozcan Kiliç amade bi. 

 

Dozgerî mutalayê xo amade kerdibi,  pêşkêşê dadgehe kerd. Dozgerî îdianame de waşt ke Rojîne bi sebebê parekerdişê serê medyaya dîjîtale bêra cezakerdiş. 

 

Avûkat Ozcan Kiliç hemverê mutalayî pawitiş kerd û dîyar kerd ke sûcdarkerdişê miwekîla ey goreyê qanûnê çapemenîye nîyo û vat demê nê sucdarkerdişî vurya yo. Ozcanî waşt, miwekîla ey bêra beratkerdiş. 

 

Serrêke û 3 aşmî ceza birnayî

 

Dadgehe qerarê xo eşkera kerd û “propagandê rêxistine” ra sînorê kêmî de serrêke ceza Rojîn Altay birna. Dadgerî dima ra bi sebebê ke sûc serê medyaya dîjîtale de ameyo kerdiş, ceza vet serrêke û 6 aşman. Dadgerî dima ra ceza serê “halê baş” kêm kerd û serrêke û 3 aşmî ceza Rojîne rê birna û qerarê hukmî do dima ra bêro eşkerakerdiş.