Rojda Aydin - Nazlican Nûjîn Yildiz

 

WAN - Bi wesîleya serrgêra yewine ya qetilkerdişê Jîna Emînîye, TJA do 16ê Êlule de Wan de rayîrraşîyayîşêk pê bîyara. Aktîvîstê TJAye seba tewrbîyayîşî venga cinîyan kerd. 

 

Cinîya kurde Jîna Emînî (Mehsa) ya 22 serre 13ê êlula 2022yî de bi bahaneyê gijikê ci asayêne hetê ‘polîsanê exlaqî’ yê rejîmê Îranî ra amebî destbendkerdene û 16ê êlule de zî badê 3 rojê komaye dinyaya xo bedilnaye. Qetilkerdişê Jînaye ra yew serrî derbaz bî. Bi wesîleya serrgêra yewine ya qetilkerdişê Jîna Emînîye bi serkêşîya Têgêrayîşê Cinîyanê Azade (TJA) Wan de Raşteyê Beşyolî yê Parkê Dabbaogluye de cinî bêrê têkişt û rayîr ra şîyayîş bikerê. 

 

Aktîvîstê TJAye ardî ziwan ke ganî no têkoşîn bêro girdkerdiş û venga heme cinîyan kerdî ke tewrê rayîr ra şîyayîşî bibê. 

 

 ‘Kurdistan de kerdoxî yenê pawitiş’ 

 

Ayşe Mînaze destpêkê qiseykerdişê xo de vist vîr ke 16ê Êlula 2022yî de Jîna Emînîye bi bahaneyê qijikê aye asayêne hetê ‘polîsanê exlaqî’ ra ameye qetilkerdiş û wina dewam kerd: “Şîdetêk teberê merdimîye vera Jînaye de pê ardî û ma bîyî şahidê nê şîdetî. Qetilkerdişê Jînaye ra nata yew serrî derbaz bî. Hîs û qewimîyayîşî sey roja yewine ganî yê. Kerdoxê tacîz û tecawuzî, leşker, polîs û qorîcîyî Kurdistan de yenê pawitiş. Ganî ma vera qirkerdişê cinîyan de vajê êdî bes o, ganî ma kişta yewbînan de ca bigîrê. Sey cinîye ma raşteyan de yê, cinî eşkena vera muameleyê teberê merdimîye de xo bi rêxistin bikera.”

 

 ‘Ma do Raşteyê Beşyolî de bê' 

 

Ayşeye dewamê qiseykerdişê xo de ard ziwan ke Wan seba ke bajarêk sînorî yo, wayîrê cayêk stratejîk o û vat ke xeylê cinîyê ke sînorî ra derbaz benê raştê destdergîya polîs û leşkeran yenê. Ayşeye dîyar kerd ke wext wextê paştîdayîşê cinîye yo û wina vat: “Seba ke ma paştîdayîşî gird bikerê, çi ferz bibo ma do bikerê. Her roje cinî yenê qetilkerdiş. Her roje bedenê cinî û porê aye sey tehluke yenê dîyîş. 16ê Êlule de do Wan de rayîr ra şîyayîş bêro viraştiş. Ma sey cinîyê TJAye 16ê Êlule de saet 13.00î de Raşteyê Beşyolî de vera qirkerdişê beden, por û rihê ma de vinderê û bêrî têkişt. Jin jiyan azadî.”

 

Vengdayîş seba rayîr ra şîyayîşî

 

Gurbet Oktay zî dîyar kerd ke Kurdistan de bi serran o kurdî yenê qetilkerdiş û dîyar kerd ke hemverê qirkerdişî, îşkence û sîstemî ganî cinîyê kurdî vajê êdî bes o wina vat: “Îran de Jîna Emînî seba porê aye asayîne ameye qetilkerdiş. Ganî no wina nêbo. Seba ke nê îşkence, şer û qirkerdişî bidê vindarnayîş, ma venga cinî û şarê xo kenê ke 16ê êlule de Beşyolî de bêrê têhet. Ma şarê xo dawet kenê. Cinîyê kurdî xeylêk bi hêz ê. Ma hêzê xo nîşanê sîstemê danê û ê ma ra tersenê. Seba ke qirkerdiş û îşkence bidê vindarnayîş no rayîr ra şîyayîş muhîm o. Ma wazenê  bibê vengê cinîyê ke ameyê qetilkerdiş. Seba nê çî ma venga pêro cinîyan kenê ke tewrê nê rayîr ra şîyayîşî bibê.”

 

 ‘Ma têkoşînê xo pîl kenê’ 

 

Nurcan Kayar zî dîyar kerd ke seba qirkerdişê hemverê cinîyan bêro vindarnayîş, lazim o cinî têkoşînêk girs bidê û vat her çiqasî cinî têkoşînê xo pîl bikerê eşkenê vernîya nê qirkerdişî padê. Nurcane, da zanayîş ke ganî cinî zêdeyêr bikewê raşteyan û hêzê xo bikerê yew û wina vat: “Ganî pêro cinî dorê xebatan de kom bibê. Sewbîna tu rayîr çin o. Wan de zî qirkerdişê cinîyan, şîdet, merdiş û merdişê bi şik xeylêk zêde bîyê. Ma zî tîya de seba ke vernîya nê bigîrê hewl danê.”

 

 ‘No rayîr ra şîyayîş seba ma muhîm o’ 

 

Nurcane, bale ant serê muhîmîyê rayîr ra şîyayîşê 16ê êlule û wina qedêna: “Seba qirkerdişê cinîyan bidê vindarnayîş roja şemeyî saete 13.00 de Parkê Dabbaoglu ma do kom bibê. Ma venga tewrbîyayîşê cinîyan kenê. No rayîr ra şîyayîş seba cinîyan muhîm o.”