ANQARA - Siyasetmedara Kurd Gulser Yildirima ke dewaya Kobanê ra nêtepişte yena muhakemekerdiş dîyar kerd ke prosesê çareserîye yeno muhakemekerdiş û vat: “Adresê çareserîye Îmrali yo. Ma aye wext wina vat. La ewro zî adresê aye ca yo. Ma têkoşînê nê dewam kenî.” 

 

Dewaya Kobanê ke Hemserekê Pêroyî yê Partîya Demokratîke ya Şaran (HDP) yê verêne Fîgen Yuksekdag û Selahattîn Demîrtaşî zî mîyan de 18 kesî ci ra tepişte pêropîya 108 siyasetmedarê kurd bi bahaneyê qewimîyayîşê 6-8ê Teşrîna Verêne ya 2014î yenê muhakemekerdiş, dewam kena. 

 

Siyasetmedara Kurd Gulser Yildirima ke dewaya Kobanê ke di serrî yo dewam kena ra yena muhakemekerdiş derheqê dewaye de qisey kerd. 

 

Gulsere da zanayîş ke bi hawayêk neheq û bêhuqûqî embazê ma bi dewaya kumpase ya Kobanê ra yenê muhakemekerdiş û wina vat: “Ma zanê na dewaye senî ameye tîya. 6 serrî ra dima dosya ameyî akerdiş û bi talîmatê qesrî na dewaye ame akerdiş. Her çî xeta polîtîkaya îqtîdarî de şino.” 

 

 Vera dîyanetî de reaksîyon 

 

Gulsere bale ant serê waştişê Dîyanetî yê seba tewrbîyayîşê Dewaya Kobanê û wina vat: “Tena Dîyanet mendbî ke tewrê na dewaye nêbî. Ganî mehkema de biameyêne vatiş la problemê wextî vera merdim nêeşkeno bi hîra hîra vajo. Dîyanet dezgehê peynî yo ke tewrê dewaye bî. Vano; rewşêke sey şima zirar da zîhnîyetê exlaq û ercê komelî, ameye ciwîyayîş. La Dîyaneto ke ganî vera tecawuzê domanan de têkoşîn bikero, mudaxale bikero, yeno tewrê dewaye beno.” 

 

 ‘Adresê çareserîye Birêz Ocalan o’ 

 

Gulsere da zanayîş ke prosesê çareserîye ke îqtîdar ci ra fortanê xo dayêne, HDP sey hemkarê xo mojna. Her çend ke kêmanîyê prosesî bibî zî gamêk raşt bî. Gulsere wina dewam kerd: “Her problem ganî bi gamêk raşt, bi dîyalogê demokratîke bêro çareserkerdiş. Ma nê çîyî timî vat. La pey beran de se bî nêzana, îqtîdar prosesî bi destê xo xerepna û embazê ma zî kerd nê rayîrî û nika zî prosesê çareserîye sey sucdarî ano vernîya ma. Mi mehkema de vat ke ma nika zî hetê aştîye de yî. Ma hetê dîyalogî de yî. Ma hetê çareserîye de yî. Adresê çareserîye vizêr dîyar bî, esro zî dîyar o û ma eynî adresî mojnenî. Ma partîyêk ke siyasetê demokratîke kenî yî. Muxatabê nê çîyî Birêz Ocalan o. adresê çareserîye Îmrali yo.”

 

‘Dewaya Kobanî hemverê ma şuxulnenê’ 

 

Gulserê sewbîna dîyar kerd ke merciyê muhakemeyê Tirkîya azad nîyê û sîstem pêro sazgehî bi zext keno binê kontrolî û pêro caardişan serê sazgehan pê yenê. Sewbîna Gulsere nê çî vat: “Ma do na dewa tenê sey qerarê ke dadger û hukm danê nêvînenê. Bi perspektîfê îqtîdarê qesrî rota yeno xêzkerdiş. Eke berjewendîyê îqtîdar siba zemînêk bînî de bo do no bivuryo. Dewaya Kobanê hemverê ma ame şuxulnayîş.”

 

 ‘Muhtewa veng a’ 

 

Gulsere wina qedêna: “AKP amadekariya desturê bingehîn ê newe de yo. Serekkomar vano ma desturê bingehîn ê newe awan kenê. La yo ke desturê bingehîn yê Kenan Evren serê lingan de verdeyo îqtîdar o. Werrekna vatişê xo de samîmî bîne. Na dewa kumpasî ya û seba vindertişî siyasetî demokratîke yê kurdî yo. Muhtewayê nê îdianameyî veng o.”