Oznur Deger

 

MÊRDÎN - Nisêbîn de cinîya bi nameyê Sabîre Demîre tuta xo ya 13 serrî gêrena. Sabîreye vat ke kênaya aye bi zorî aye ra ameya girewtiş û 13 serrî yo seba dîyîşê kênaya xo têkoşînê huqûqî dana û derheqê babete de muracatê sucî kerda la her tim bi bahaneyê nêtaqîbî netîce bîyo. 

 

Qezaya Nisêbînî ya Mêrdînî de Sabîre Demîr û Ahmet Yildizî bi mareyê dînî zewecîyenê. Serra 2010î de kênaya aye Ruken Demîre yena dinya. Sabîreye dîyar kerd ke kênaya aye hetê Ahmet Yildiz û dadîya ci Hamdîye Yildize ra ameya remnayîş û 13 serrî yo kênaya xo gêrena. Sabîreye nizdîyê yew serrî verê cû bi avûkatê xo reyde sucê ‘bi zorî tute remnayî’, ‘parsekî pê kerdî’ muracatê Serdozgerîya Komare ya Nisêbînî da. La dozgerîye bi bahaneyê wextvîyarto ra qerarê bêtaqîbî da û seba parsekî zî qerarê cigêrayîş û cipersayîşî da. Seba ke Hamdîye Yildize her tim adres bedilnena, dosya bi serran o aver nêşina. 

Wexto ke digane bîya raştê hewldayîşê qetilkerdişî ameya 

 

Sabîreye dîyar ker ke bi Ahmet Yildizî reyde mareyê dînî zewecîyaya û dima ra zî bi hawayêkê sîstematîk şîdet bi aye ameyo kerdiş û wina dewam kerd: “Ahmet nêxebetîyayêne. Madeyê tîryakî şixulnayêne. Îşkence bi mi kerdêne. Wexto ke ez digane bîya waşt ke mi kardî bikero. Hewl da ke mi bikişo. La mi ci kardî kerd û ez keye ra remaya. Ez şîya verê keyeyê xo. Ez o wext digane bîya. Tuta mi keyeyê dadîya mi de ameye dinya. Ahmet û Hamdîye bi bahaneyê dîyîşî ameyî. La bi zorî girewtî û şîyî. Vatî ke rewşa ekonomîya keyeyî çinî ya tuta mi berdî.” 

 

 ‘Parsekîye pê kenê’ 

 

 Sabîreye da zanayîş ke 13 serran de tena 2 reye qaseyê yew saetî kênaya xo dîya û vat: “Ez şîya her ca. Mi her çîyî kerd la tuta mi nêmojnenê. Her tim adres bedilnenê. Ez nêzana kênaya mi kam ca de ya. Qet nêşirawitî mekteb. Wendiş û nuştişê aye çin o. Coka ra nêeşkena mi bigêra. Bi paştîya kênaya mi pere qezenc kenê. Yanî parsekî pê kenê. Ez bi serran o têkoşîn dana. Ganî kênaya mi kişta mi de biba. Zamayê verêne yê Hamdîyeye T.G.yî venga mi kerd û vat ke ez do seba kênaya to biba hetkar. Bi nê bahaneyî venga mi kerdî, ez şîya dikan. La tacîzê mi kerd. Mi muracatê sucî kerd.”

 

 ‘Wa kênaya mi rê bîyarê’ 

 

 Sabîreye qiseykerdişê xo yê peyênan de nê çîyan vat: “Nasnameyê kênaya mi çin o. Wexto ke şinê pêvînayîşê pîyê xo uca de wesayît piro dano û birîndar bena. Seba ke nasnameyê aye çinî bî nêweşxane vano na tute Kobanê ra ya û benê yurd. Di serran binê pawitişê dewlete de manena û dima ra gênî. Ganî tuta mi nêdîya înan. Cîranan vatî îşkence û şîdet bi kênaya to kenê. Wa dewlete kênaya mi bivîna û bida mi. Tena ez nê çîyî wazena.”