MERKEZÊ XEBERAN – 7 tepişteyê cinî yê ke Zîndanê Evînê de yenê tepiştiş, eşkera kerdî ke bi wesîleya paştîdayîşê serrgêra serewedarnayîşî çalakî dayî destpêkerdiş û wina vatî: “Bawerîya ma ya ke ma heta serkewtişî têkoşîn bidî rayraberdiş esta.” 

 

7 tepişteyê cinî yê siyasî ke Zîndanê Evînê yê Îranî de yenê tepiştiş, eşkera kerdî ke qetilkerdişê Jîna Emînîye vera û semebê serrgêra serewedarnayîşê “Jin jiyan azadî” hewşa zîndanî de 14ê Êlule de çalakîya roniştişî dayî pê ardî. Çalakîya tepişteyê bi nameyê Azadeh Abedînî, Sepîdeh Qalîan, Şakîla Monfared, Golrokh Iraeî, Narges Mohammadî, Mahbobeh Rezaeî û Vîda Rabbanîye bi rayîrê pawitoxa heqanê merdiman Narges Mohammedîye bi mesajê hesabê xo yê medyaya dîjîtale ame eşkerakerdiş. 

 

 ‘Ma do têkoşînî dewam bikerî’ 

 

 Eşkerayîyeya ke ameye dayîş de wina ameye vatiş: “Ma sey tepişteyê cinî yê siyasî ke Zîndanê Êvînê de yenê tepiştiş, seba paştîdayîşê şarê xo bikerî û hukmatî şermizar bikerî 14ê Êlule de hewşa zîndanî de çalakîya roniştişî da dest pêkerdiş. Qetilkerdişê Jîna Emînîye ke hetê ajanê Komara Îslamî ya Îranî ra ameye qetilkerdiş sero ra yew serrî derbaz bî. Nefreto ke ma vera kiştişê cinî û xortê welatê ma yê ke raşteyan de û zîndanan de, daliqnayîşê înan, korkerdişê çalakgeran, tepiştişê kesê ke sere wedarnayî, îşkencekerdişê înan û tepiştişê înan hîs kenî, no birîn û dejêk o. Bawerîya ma esta ke ma heta serkewtişî têkoşîn bikerî. Ma sey tepişteyê cinî yê siyasî têkoşînê azadî û seyyewbînanî de şarê Îranî pawenê, paştî danî. Ma polîtîkayê zextker û zalimî yê şîdetkarî yê olperestê otorîterî şermizar kenî. Ma do bi şarê kurd û Îranî reyde bî. Rayaumûmîye ya demokratîk û heme şarê ke wazenê bibî vengê şarê Îranî û xoverdayoxan rê.”