RIHA - Parlamentera Partîya Çep a Keske ya Rihayî Dîlan Kunt Ayan ke derheqê Kampanyaya TJAyî ya bi sloganê "Bi Jin jiyan azadîye reyde ver bi azadîye" startê ci Riha de ame dayîş de qisey kerd. Dîlane  dîyar kerd ke sloganê, "Jin Jiyan azadî" seba cinîyan felsefe yo û vat, "Ma sere de wazenê şerê taybetî yê Kurdistanî de yeno rayraberdiş, vindarnê.”

 

Deklerasyonê kampanyaya Tevgerê Cinîyanê Azadan (TJA) yê bi sloganê "Bi jin jiyan azadîye reyde ver bi azadîye” ke do 6 aşmî dewam bikero, 15ê êlule de Riha de ame eşkerakerdiş. TJAyî deklerasyonê xo de hemverê hêrişê vera bîyayîşê cinî venga pîlkerdişê têkoşînê seba azadîya komelî ya serkêşîya cinîyan de kerd. Çarçewaya kampanyaya hemverê qirkerdişê cinî û xoza, polîtîkayê şerê taybetî yê Kurdistanî û tecrîdê mutleq ê serê Rayberê PKKyî Abdullah Ocalanî do xeylêk çalakî bêrê organîzekerdiş.

 

Parlamentera Partîya Çep a Keske ya Rihayî Dîlan Kunt Ayan derheqê kampanyaye de ercnayîş kerd.

 

‘Tecrîd tenê mîyanê 4 dêsê Îmraliyî de nîyo’

 

Dîlan Kunt Ayan destpêkê qiseykerdişê xo de dîyar kerd ke serê rayberê PKKyî Abdullah Ocalanî de 24 serrî yo tecrîd yeno rayraberdiş labelê bi 30 aşmî yo açaryayo tecrîdêk mutleq. Dîlane wina vat: “Sewbîna Tirkîya de bi xususî cinîyê kurdî binê tecrîdî de yê. Labelê bi tenê cinî nê, ganî ciwan û pêro beşê demokratîkî nê tecrîdî rê reaksîyon bimojnê û vajê nê. Seba ke no tecrîd bi tenê serê birêz Ocalanî nê, pêro zîndanan de û serê cinî û xoza tesîrêk gird kerdo.”

 

‘Ma tu wext polîtîkayê zextî qebûl nêkerdî’

 

Dîlane bale ant serê têkîlîyê şar û rayberê PKKyî Abdullah Ocalanî û dîyar kerd ke wexto ke mabêne danê tecrîd û birêz Ocalan bi avûkat û keyeyê xo reyde pêvînayîş keno, no tesîrê xo serê şarî de zî keno û wina vat: “Nê pêvînayîşî ameyîne a mana ke  Abdullah Ocalan aştîye de israr keno. Sewbîna îqtîdarê AKP-MHPyî dimayê ke weçînayîşê peyîn de vînî kerdî, bi zextê serê şarî xo nimitî. Labelê ma nê qebûl nêkenê. Nîmeyê welatijê Tirkîya mojnayî ke wazenê nê sîstemê zextî vindarnê. Ma wazenê bi berzkerdişê vengê xo peynîya tecrîdî bîyarê.”

 

‘Wazenê paradîgmaya birêz Ocalanî asteng bikerê’

 

Dîlane vat ke tecrîdê serê rayberê PKKyî Abdullah Ocalanî de yeno rayraberdiş û qanûnê înfazî yê Tirkîya tu cayê dinya de nimûneyê ci çin o û wina vat: “Sebebê nê estê. Wazenê ke sîstemê paradîgmaya birêz Ocalan asteng bikerê. Ma wextê weçînayîşê 2015ine û rewşa a wextî de bîyarê vîrê xo, eşkenê bivînê ke o wext rewşêke aram esta. Labelê sîstemî waşt mudaxeleyê na rewşe bikero. Paradîgmaya Ocalanî bi tenê seba şarê kurdî nîya, seba pêro şarê Tirkîya ya. Eslê xo de fîkrî yenê tecrîdkerdiş.”

 

‘Kampanya do bi felsefeyê Jin jiyan azadî dewam bikera’

 

Dîlane vat, kampanyaya ke startê ci dayê û da zanayîş ke bi felsefeyê ‘jin jiyan azadî’ do na kampanya rayra berê. Dîlane wina qalê muhtewayê kampanya kerd: “ Ma do hem hemverê nê çî de vinderê, hem zî perwerde û îqazkerdişî zêde bikerê. Sewbîna bi serkêşîya cinîyan hemverê tecrîdî çalakîyê ma do dewam bikerê. Eynî wextî de polîtîkayê şerê taybetî yê serê ciwanan zî ma qebûl nêkenê. Ma nêverdenê AKP- MHP destkewtişê cinîyan çin bikero.”