AMED - Abdulhamît Altan, Ayşe Altan qetil kerd. Abdulhamit Altano ke badê qetilkerdişî remabî qezaya Mêrdînî ya Qoserî de ame tepiştiş. Cinîya birayê Ayşe Altane Leya Gencere dîyar kerd ke berpirsîyarê qetilkerdişê cinîyan dewlete ya.

 

Her roje Kurdistan û Tirkîya de cinî yenê qetilkerdiş û bi şîdetê tewri bi tewiran reyde rî bi rî manenê. Înan ra yew zî Ayşe Altane ya. Ayşe bi destê Abdulhamît Altanî, bi hawayêkê hovane, verê çimanê tutanê xo de ameye qetilkerdiş. Cinîya birayê Ayşe Altana ke ameye qetilkerdiş Leya Gencere da zanayîş ke mudaxalenêkerdişê dewlete vera cinî yenê qetilkerdiş û dîyar kerd ke ceza nîna dayîş.

 

‘Bebikê aye estbî’ 

 

Cinîya birayê Ayşe Altane Leya Gencere destpêkerdişê qiseykerdişê xo de ard ziwan ke kerdox Abdulhamît Altanî badê qetilkerdişê Ayşeye telefonê birayê aye kerd û wina vat: “Mi aye qetil kerd.” leylaye wina dewam kerd: “Ayşe 8 serrî bî zewecnaye bî. 4 tutê aye estbî û înan ra yew hema bebik bî. Rojanê peyênan de mabenê înan çinî bî. Ma aye rê vatêne fek ci ra biverde û bê. La vatêne ez nêeşkena tutanê xo biverda.” 

 

‘Di roje verê cû planê qetilkerdişî kerdo’ 

 

Leylaye dîyar kerd ke Hamît Altan nîmeyê şewe mêrdeyê aye rê mesaj şirawito. Leylaye da zanayîş ke kiştox di roje verê cû planê qetilkerdişî kerdo û wina qiseykerdişê xo dewam kerd: “Ma hewn de bî û coka ra ma mesaj nêdî. Nizdîyê şefeqî dî û saet 7.30î de telefon kerd û vat bêrêne tutanê mi bigîrê. Ma vat seba çi? Vat mi Ayşe qetil kerdo.”

 

‘Eke dewlete wextê xo de mudaxale bikerdêne Ayşe nêameyîne qetilkerdiş’ 

 

Leylaye bale ant serê qetilkerdişê cinîyan ê pêroyî û da zanayîş ke cinî bi mergî û hêrişî şîdetin reyde rî bi rî manenê û Leylaye seba qetilkerdişê cinîyan dewlete berpirsîyar dî û wina vat: “Dewlete eke ceza bibirnayêne, cinîyê sey Ayşe û tutê şenikî nêkewtêne na rewşe. Eke dewlete wextê xo de mudaxale bikerdêne Ayşe nêameyîne qetilkerdiş. Ma nêeşkayî aye teşhîs bikerê. Payanê aye ra ma aye nas kerd. Ez nê vatişa ra tepîya dewlete rê vaja se?”

 

‘Wa bi lêz mudaxale bikerê’ 

 

Leylaye qiseykerdişê xo yê peyênan de seba qetilkerdişê Ayşeye veng kerd û da zanayîş ke wa tutî bê dadî nêmanê. Leylaye vat ke ganî dewlete seba vernîgirewtişê nê qetlîyaman cezayê ewilan bida û wina qiseykerdişê xo peynî kerd: “Wa bi lez mudaxale bikerê. Wina nêbo do zaf kesî sey Ayşe bêrê qetilkerdiş. Wa Ayşe biba cinîya peynî. Wa cinî nêmirê.”