AMED - Komeleya Edebîyatkaranê Kurdan bi eşkerayîyêke hêrişê awanîya KNKyî ke ameyo kerdiş şermezar kerd û da zanayîş ke amac kes nîyo, amac tarumarkerdişê yewîya neteweyî yê kurdan o. 

 

Vizêr dormeyê saet 17.00î de Hewlêr de bi çekan hêrişê awanîya Kongreya Neteweyî ya Kurdistanî (KNK) ame kerdiş. Ame dîyarkerdiş ke hêriş de Temsîlkarê KNKyî Denîz Cevdet Bulbunî ameyo qetilkerdiş. Komeleya Edebîyatkaranê Kurdan bi eşkerayîyêke hêrişê awanîya KNKyî ke ameyo kerdiş şermezar kerd û da zanayîş ke amac kes nîyo, amac tarumarkerdişê yewîya neteweyî yê kurdan o.

 

Eşkerayîya Komeleya Edebîyatkaranê Kurdan wina ya:

 

"Her çar beşê Kurdistanî de hêzê îşxalkerdeyî yewser yan zî nêyewser yewî û destkewtişê kurdan hedef gênê. Seba kurd nêbê yew û bi hawayêkê yewpare wayîrê destkewtişanê xo nêvejê, çi destê înan ra yeno kenê. Seba nê çîyî hema hema her roje her çar parçeyê Kurdistanî de hêrişê kurdan kenê. Vizêr zî Hewlêrê Başûrê Kurdistanî de Kongreya Neteweyî ya Kurdistanî (KNK) ke amacê aye yewîya neteweyî ya kurdan a, raştê hêrişê çekdarî ame. Netîceyê hêrişî de temsîlkarê KNKyî Denîz Cevdet Bulbunî ame qetilkerdiş. Ma nê hêrişê vera KNKyî bi her tewirî şermezar kenê û sereweşî keyeyê Denîz Cevdet Bulbun û şarê kurdî rê wazenê. 

 

Venga yewîtîye 

 

Ma zanê ke amacê nê hêrişanê ke vera KNKyî ke ameyo kerdiş kes nîyo, amac tarumarkerdişê yewîya neteweyî yê kurdan o û destkewtişê înan o. Coka ra ma sey Komeleya Edebîyatkaranê Kurdan venga pêroyê şarê kurd, partî, dezgeh û dezgehê kurdan û bi taybetî zî nuştox û roşnvîrê kurdan kenê ke vera nê hêrişanê ke çimverdayî yewîya kurdan de wayîrê nizdîbîyayîş bibê û nêverdê îşxalkerî û ortaxîya înan ruhê yewîya ma bişikinê.”