MERKEZÊ XEBERAN - Dewleta Îranî serrêke dimayê qetilkerdişê Jîna Emînî, qanûnêk tesdîq kerd ke cinîyê ke sereyê xo nêpêşê, caardişê giranî ferz keno.

 

Goreyê çapemenîya fermî, pêşnîyaz qanûnêk ke çend aşmî yo ameyîne munaqeşekerdiş û caardişê giran ê cinîyan ferz keno ke mîyanê şarî sereyê xo nêpêşê, 20ê êlule de Parlamentoyê Îranî de ameyo tesdîqkerdiş.

 

Ajansê Xeberan ê Îranî serê babete de nê zanayîşî dayî: "Seba pêşnîyaz qanûnê 'piştiş û îfetî' hîrê serrî bêro ceribnayîş, parlamenteran pêşnîyazî tesdîq kerd.”

 

Dimayê ke Jîna Emînî 16ê êlule 2022ine de Tehran de bi sebebê 'porê xo baş nêpişta’ hetê polîsê exlaqî ra ameya qetilkerdiş, serewedaritişêk bêhempa bi serkêşîya cinîyan dest pêkerd.

 

Cinîyan bi sloganê "Jin, Jiyan, Azadî" her cayê Îranî de wuştî serê payan.

 

Aşmê peyîn dimayê ke cinîyan bi rengêk serakerde vejîyayî meydan, nêrazîbîyayîşê xo bi xurtî nîşan dayî, hukmatî dest bi girankerdişê polîtîkayê dişminîyê cinîyan kerd.

 

Seba pêşnîyazî bibo qanûn ganî hetê Konseya Pawitişê Destûrê Bingehîn ra bêro tesdîqkerdiş.