AMED - Merdimê Vîndîbîyayeyan nê hewteyî Amed de aqûbetê Îbrahîm Gumdemî persayî. 

 

Merdimê Vînîbîyayeyan û îdarekarê Komeleya Heqê Merdiman (ÎHD) ê Şubeyê Amedî hewteyê 763ine de çalakîya “Wa vînîbîyayeyî bêrê vînayîş û faîlî bêrê muhakemekerdiş” verê Yadkerdişê Heqê Cuye yê Parkê Koşûyolû yê Amedî organîze kerdî. Çalakî de fotografê vînîbîyayeyan ameyî wedaritiş û pankartê ke fotografî ser de bî erd de dayî ro. Merdimê vînîbîyayeyan û heqê merdiman tewrê çalakî bîyî. Çalakîya na hewte de aqûbetê Îbrahîm Gundemî ame perskerdiş.

 

Çalakî de Temsîlkara Serekê HDPyî ya Amedî Suzan Mehmetoglu Aksoy qisey kerd û bale ant serê serrgêra qetilkerdişê Jîna Emînî. Dima ra zî seba neqlkerdişê aqûbetê Îbrahîm Gundemî endama Komîsyonê Merdimanê Vînîbîyayeyan ê ÎHDyî avûkate Berfîn Elçî heqê qiseykerdişê kerd.

 

Berfîne dîyar kerd ke 25ê êlule serra 1991ine de dewa Sarierîke ya Hezroyê Amedî leşkeran eşt serê keyeyê Ahmet Gundemî û wina vat: "Şewe saete 01.00 de leşkeran eşt serê keyeyî û Îbrahîm ame destbendkerdiş. Ame dîyarkerdiş ke do sereyê sibayî bêro veradayîş, Ahmet seba persê lajê xo Îbrahîm bikero şi qereqol. La cewabê 'Destbend nîyo’ girewt. Nê ser de Ahmet hewl da ke aqûbetê lajê xo bimuso. Muracatê Serdozgerîya Komare ya Hezroyî keno. Dozgerî Ahmetî şiraweno qereqole. Na rey Ahmet bi waştişnameyêk bi fermî muracatê qereqole keno. La cewab nêdayî waştişnameyê Ahmetî. Dima ra muracatê Walîtîya Amedî kerd. Qereqole walitî ra cewabê 'Verê ma de nîyo’ girewt. Ahmet dima ra şino Fermendarîya Cendermeyî yê Bajar, tîya zî cewabê 'Şima dewlete sûcdar kenê û dewlete çîyê wina nêkena’ gêno û yeno tehdîtkerdiş. 

 

Eşkerayîye dimayê çalakîya roniştişî peynî bî.