Şehrîban Aslan

 

AMED - Avûkate Ozum Vurgune 25ê Gulane de Zîndanê Cinîyan ê Amedî ra tehlîye bîye û derheqê tutê ke bi dadîyanê xo reyde zîndan de manenê de wina vat: “Tutêk kreş de mîz kerdbî, bifikirêne gardîyanan seba tutî zabitname girewt. Zabitname de tutî ra persayî ‘Qey to mîz kerd?” 

 

Peynîya serra 2020î ra tepîya hûmara tutê ke mebêne 0-6î yê ke bi dadîyayê xo reyde zîndanan de manenê 800î ra zêde bî. Adara 2021î de goreyê dayeyanê fermîye na hûmare 345 bî. Serra 2022yî de zî 2 hezar tutî kişta dadîyanê xo de zîndanan de mendî. Avûkate Ozum Vurguna ke operasyonê hemverê avûkat, sîyasetmedar û rojnamegeran de ameye tepiştiş çimdarîyanê xo pare kerd. 

 

Ozuma ke 25ê Gulane de Zîndanê Cinîyan ê Amedî ra tehlîye bî, çimdarîyanê xo yê derheqê dadîyê siyasî û edlî yê ke bi tutanê xo reyde zîndanan de manenê vat û dewam kerd: “Mabenê tutanê siyasîyan û edlî nîno kerdiş. Wexto ke merdim ewnîyeno tutê ke demêk derg uca de mendî, merdim vîneno ke musayî uca. Yanî ma eşkenê vajî ke tutê ke newe yenê zîndan hetê yê verênan ra yenê pelçiqnayîş. Nimune koxuşê ma de Çiya estbî. Koxuşê bîn de zî tutêk ame verê Çiya û vat ‘Ez zî tîya de ya, ez zî esta’.”

 

‘Roje de 4 reyan tutan ser de cigêrayîş kerdêne’

 

Ozume bale ant serê prosesê kreşê zîndanî û wina vat: “Tay werd û awe kerdêne çenteyê tutan. Seba ke awe bî awe zî tede tu çîyêk çinî bî. Tutî serê sibayî saete 09.00î de koxuş ra ameyêne berdiş. Saete 12.00î de ardêne. Wexto ke vetêne her cayê înan ra ewnîyayêne. Saet 14.00î de reyna berdêne û reyna cigêrayîş kerdêne. Saet 16.30î de ardêne reyna cigêrayîş kerdêne. Babetêka bîn zî tutî mabenê yewbînan de vanê dadîya to qey ameya tepiştiş. Ma bêrî merheleya mamostetîye. Merheleya to mamostetîye rê zî mird nêkeno. Tutî vatêne ma tena kayan kay kenê. Kreş de her çî ê bi xo kenê.”

 

Ozume dîyar kerd ke kreş de perwerdeyê lavabo zî nêdîyeno tutan û wina domna: “Tutêk ma ver ra berdî, saetêk ra dima ardî. Vatî ganî şima perwerdeyê lavabo bidî tutî. Hîrê roje dayî ma û vatî ganî şima perwerdeyê lavabo bidî ci. Ma tutî musna la reyna ardî. Vatî ke nêeşkeno solanê xo girê bido.” 

 

‘Seba tutan zabitname’ 

 

Ozume dîyar kerd ke rojêk wexto ke koxuşe ra vejîyaya dadîyêk koxuşê edlî ra tutê xo rê vatêne ‘to reyna ez rezîl kerda’ bermayêne û wina qiseykerdişê xo peynî kerd: “Dima ra ma musayî ke tutî mîzê xo kerdo. Seba nê çîyî zî zabitname ameyo hadrekerdiş. Zabitname de vatêne ‘To qey mîz kerd, to semedê çi mîz kerd’. Dadî zî gardîyanî zî zabitname îmze kerdbî. Xora kayê tutan nêdanê tutan. Di desan reyan ma vat la nêdayî. Seba tutan tu çîyêk çin o.”