Melîke Aydin

 

HATAY - Erdlerzê 6ê Sibate sero ra 7 aşmî derbaz bî û hema zî Hatay de şert û mercê cuye raşt nêbîyî. Cinîyan dîyar kerd ke hema keyeyê înan çin o, cayêk ke tede bimanî çin o û ameyî vîrîkerdiş.” 

 

Erdlerzê 6ê Sibate ke merkezê ci Mereş bî sero ra 7 aşmî derbaz bî. Her çend ke hende wext derbaz bibo zî hema problemê herême nêameyî çareserkerdiş. Lazimîya esasî dewam keno û hemwelatijî zimistanî konan de pêşwazî kenê. Cinîyê Hatayî sere de problemê pakî, xeylê babetanê bînan de problem ciwîyenê. Cinîyan dîyar kerd ke abîyayîşê mekteban reyde problemê kirtasîye û serwîsî zî ciwîyenê û vatî ke Hatay ameyo vîrîkerdiş. 

 

'7 aşmî yo 7 kes eynî xeymeyî de manenê’ 

 

Nîmet Kiliçlara ke Samandagi de xeyme de manena dîyar kerd ke roja erdlerzî de keyeyo ke tede kîra de mendêne rijîyayo û wina dewam kerd: “7 aşmî yo ma eynî şert û mercan mîyan de yê. Tutêk mi astengdar o. Hîrê torinê mi estê. Ez bi înan reyde eleqedar bena. 7 aşmî yo ma xeyme de manenê. Problemê tewr gird banyo û tuwalet o. Hîjyen çin o. Tena mêrdeyê mi meaş herîneno. Ma seba konteynirî muracat kerd la nêame. Ma 7 kesî xeymeyêk de manenê. Keye vaye yê. Varan vareno. Xeyme awe gêno zerre. Ma do soba bironî la wina senî ma do dewam bikerê nêzana. Awe îtfaîye ana. Ez awa şimitişî Hidirbeylîyî ra ana.”

 

‘Cuya xeyme zehmet a’ 

 

Bîrsen Kîmyongoke zî badê erdlerzî keyeyê aye zirar dîyo û baxçeyê keyeyê xo de xeyme akerda. Bîrsene nê çîyan ard ziwan: “Keyeyê ma bi rîsk o. la ma reyna zî lazimîyanê xo uca de ca anê. Konteynirê Hidirbeylîyî ma rê vejîya. Ma vat ma xeyme de manenê. Çike zaf dûrî bî. Ma vat konteynir bîyarêne verê berê ma. Lajêk mi şino lîse. Cuya xeymeyî de zehmetin a. Ez bîya nêweşa tansîyonî. Mêrdeyê mi 65 serrî yo û xebetîyeno. Makînayê kincan ê ma xeripîya. Zimistan yeno ma nêzanê se bikerê.” 

 

Cinîya bi nameyê lşkin ke nêwaşt peynameyê xo bida zî nê çîyan vat: “Ma çar keye ke merdimê yewbînan ê 7 aşman xeymeyêk de mendî. Tutê mi nêweşê epilepsî yo. Mîyanê nê şertan de ez ewnîyena ci. Ma verê cû timî berdêne nêweşxane. La dimayê erdlerzî ma nêeşkenê derzînê ci bidî piro. Yew serrî derbaz bî. Ma ereba û lazimîyê ci yê bînî dormera arê da.”

 

‘Ma wexto ke domanan şirawenê mekteb fikarin î’

 

Aylîn Bayrame zî dîyar kerd ke erdlerz de merdimê aye dinyaya xo bedilnayî û keyeyê aye zî rijîyayo û dumano ke xirban ra vejîyeno probelmê weşîye vejeno û wina dewam kerd: “Ma wexto ke tutan şirawenê mekbete bi fikar ê. Wextê ewilan de asayîşê canê ma çinî bî. Her ca de diz estbî. Kelepulê ma talan kerdî. Ma awanîyê xisarinan ra tersenê. Awanîyan rijnenê la xirban erd ser de verdenê. Ma mîyanê herre de manenê. Ma heme na herre vera nêweş kewtî. Keyeyê ma çin o. Cayo ke ma tede bimanê çin o. Problemê awe esto.”