Nazlican Nûjîn Yildiz

 

WAN - Hemsereka TUHAY-DERî ya Wanî Edîbe Babure da zanayîş ke binpaykerdişê heqan yê zîndanan her ke şino giran beno û her roje keye û tepişte derheqê binpaykerdişan de muracat kenê. Edîbeye ard ziwan ke binpaykerdişê heqan yê zîndanan girêdayeyê tecrîdê Îmraliyî yê serê Rayberê PKKyî Abdullah Ocalanî yo. 

 

Zîndanan de binpaykerdişê heqan yê serê tepişteyan her ke şino zêde beno. Tecrîdê serê Rayberê PKKyî Abdullah Ocalanî vernîya binpaykerdişê heqan yê zîndanan akeno. Tepişteyê nêweş nînê dermankerdiş û tehlîyekerdiş. Heto bîn de zî şîdetê fîzîkî û psîkolojîk zêde beno. Tewr peynî 31ê Tebaxe de zîndanê Tîpê Lyî yê Panosî de hîrê tepişteyê cinî bi tale ameybî girêdayîş û îşkence bi înan ameybî kerdiş. Hemsereka Komeleya Hetkarîya Keyeyê Tepişteyan a Wanî (TUHAY-DER) Edîbe Babure derheqê binpaykerdişê zîndanan de qisey kerd û vat ke eke tecrîdê Îmraliyî wedarîyo do rayîrê aştîye abibo. 

‘Tecrîd bi komployê 9ê Teşrîna Verêne dest pêkerd‘

 

Edîbeye dîyar kerd ke tecrîdê serê zîndanan û şarî ewro dest pênêkerdo û tecrîd bi komployê 9ê Teşrîna Verêne dest pêkerdo û vat: “Tecrîd heme şaran ser de tesrî virazeno. Komel bê nefes verdayo. Tecrîdo tewr gird 21 serrî yo serê kurdan de yeno rayîr ra berdiş. Rejîmê faşîst ê AKP-MHPyî 21 serrî yo zilm rayîr ra beno. Ne şaran şinasneno ne zî qanûnan. Goreyê xo îşkence keno. La mecburê peynîya nê zilmî bîyarê.”

 

‘Sucê merdimîye kenê’ 

 

Edîbeye dîyar kerd ke xeylê merdimê tepişteyan muracatê TUHAY-DER, ÎHD û OHDyî kenê û wina vat: “Tepişteyan ra zî mektube yenê. Çareserîya nê problemî bi têkoşînê hempar ê şaranê Tirkîya eşkeno pê bêro. Ganî heme şarî têkişt de ca bigîrê. Demê peyênan de PDK hêrişan pê ano. Na rewşe nîna qebulkerdiş. Her roje hêrişê dew û koyanê ma kenê. Sucê merdimîye kenê. Bi çekê kîmyewî hêrişan pê anê. Exlaqê şerî zî esto. La çi heyfo ke mîyanê nê sîstemê lêşin de blokê AKP-MHPyî de ne exlaqê şer ne zî yê merdimîye esto.”

 

‘Tepişteyê 30 serrî do nika teslîm bibê’ 

 

Edîbeye ard ziwan ke zîndanan de derheqê cuye de tu çîyêk nêmendo û her roje tepişte raştê îşkenceyî yenê û vat: “Sebebanê cîyayan vera cezaya dîsîplînî dîyena tepişteyan û înfazê înan yeno veşênayîş. Heyetê taqîpkerdişî awan kerdî. No heyet caardişanê kêfîyan pê ano. Zîndanan de poşmanî ferz kenê. Tepişteyê ke 30 serrî yo tepişte yê do seba 6 aşman teslîm bibê. 31ê Tebaxe de zîndanê Tîpê Lyî yê Panosî de hîrê tepişteyê cinî raştê îşkenceyî ameyî. Bi seyan tepişteyê nêweş estê. Goreyê dayeyan 670 tepişteyê nêweş ê giran estê. Tay tepişte bi tena sereyê xo nêeşkenê biewnê xo ra. Ganî ê serbest bêrê verdayîş. Ganî bêrî dermankerdiş. Ma Rojbîn Çetîne ra nimune bidê. Rojbîne îradeyê şarî ya. Wexto ke şî Amed ke derman biba sereştişê keyeyê xo de ameye tepiştiş û bi kutikan Rojbîne birîndar kerdî. 5-6 nêweşîyê embaza ma estê. Nêweşîya rîşa merdimwere ya kolonî aye de esta. Heme dermankerdişê aye ameyî vindarnayîş. Sey Rojbîne bi seyan tepişte estê.”

 

‘Wa pêvînayîş bi Birêz Ocalanî reyde bêro kerdiş’

 

Edîbeye da zanayîş ke seba wezîrîya edaletî venga înan esta û heta nika tu wezîrêk edaletî pê nêardo û qiseykerdişê xo wina peynî kerd: “Ganî wezîrîya edaletî wezîfeyê xo bîyara ca. Ganî tecrîdê serê tepişteyan û Birêz Ocalanî bêro şikitiş. Ganî tecrîd bêro wedaritiş. Heme zilm tecrîdî vera pê yeno. Wa bi Birêz Ocalanî reyde pêvînayîş bêro kerdiş. Sewbîna ganî bi lez tepişteyê nêweşî serbest bêrê verdayîş.”