AMED - Serê qetilkerdişê Ceylan Onkola ke Licê de wexto ke pes çerênayêne bi topê havanî ameyebî qetilkerdiş ra 14 serrî derbaz bî. Pey Ceylane de tena roşnaya çimê aye û fotografê aye yê 7 serrî mend.

 

Polîtîkayê şerê taybetî yê îqtîdarî vera Kurdistan de tutî bi destê dewlete yenê qetilkerdiş û îşkence bi înan yeno kerdiş. Her çend ke kiştoxê tutan bêro zanayîş zî hetê dewlete ra nînê cezakerdiş. Nê tutê ke hetê kesê bi unîformayan ra ameya qetilkerdiş Ceylan Onkole ya. 

 

Ceylan Onkole hema 12 serrî bî 28ê êlula 2009î de dewa Gundikê Xanbazî ya Kanîsipîyî ya qezaya Licê ya Amedî de wexto ke pez çerênayêne bi topê hevanî ke qereqol ra ame eştiş, ameye qetilkerdiş. Dadîya Ceylane Salîha Onkole parçeyê bedenê kênaya xo bi destanê xo arê kerd û kerd pêşilê xo. No dîmen 14 serrî yo hafizayê şarî de cayê xo ganî verdeno.

 

Şûbeyê Komeleya Heqanê Merdiman (ÎHD) ya Amedî serra 2009î de eşkerayî da û dîyar kerd ke pay û çaqeyê Ceylane saxlem ê, erd de kort çin o û no zî îhtîmalê teqayîşê mayînî raşte ra wedarneno. ÎHD da zanayîş ke kiştişê Ceylane de hedef esto. 

 

Her çend ke tehqîqat dest pêbikero zî qerarê nimitişî vera malumat seba avûkatê keyeyê nêame dayîş. Avûkatê keyeyî vera qerarê nimitişî de îtîraz kerdî la îtîrazê înan ame redkerdiş. Avûkatan serra 2010î de muracatê Mehkemaya Heqanê Merdiman a Ewropaye (AÎHM) DAYÎ. Aşma gulana 2012yî de semedo ke tehqîqatêk hîra nêame kerdiş, waştiş ameyî redkerdiş, her çend ke wext derbaz bibo zî dewa nêameye akerdiş, seba ke kiştox bêrê dîyîş avûkatan reya diyîne muracatê AÎHMyî kerd. 

 

30ê Nîsana 2014î de Serdozgerîya Komare ra Licê ke derheqê qetilkerdişê Ceylan Onkole de tehqîqat rayîr ra berdêne bi bahaneyê delîl û kerdoxê raporan mird nêkenê seba dosya qerarê daîmî da. 

 

Serra 2012yî de reyna muracatê AÎHMî ameybî kerdiş û 5 serrî ra dima 17ê Çeleyê 2017î de muracat bi netîce bî û qerarê ‘hetê cigêrayîşê tesîrin û binpaykerdişê heqan de binpaykerdiş çin o’ da. 

 

Kerdox 'bi qusur' ame dîyîş 

 

Qerarê şûraya dewlete de ame vîrvistiş ke cayo ke Ceylane ameya qetilkerdiş de bi muhîmatê leşkerî 4 reyan tede pêrodayîş vejîyayo. Versuc ‘bi qusur’ ameyî dîyîş. Şûraya Dewlete uca de qerar xeripna û seba qerarêk newe bêro dayîş da zanayîş ke ganî dosya şêro gama yewine. 

 

8ê Adara 2021î de qerar ame dayîş ke seba keyeyî 283 hezar TL tazmînatê ekonomî û manewî bêro dayîş. 

 

Musabaqaya fotografan ê Ceylan Onkole 

 

Serra 2010î de hetê Komeleya Heqanê Merdiman (ÎHD) a Çewligî ra seba yadkerdişê Ceylan Onkole musabaqayê fotograf, şîîr û hîkayeyan ame viraştiş. Her serre no musabaqa yeno viraştiş. 

 

Hetê qeyûmî ra nameyê Parkê Ceylan Onkole ame bedilnayîş 

 

Serra 2017î de Koma Meclîsê Şaredarîya Partîya Herêmê Demokratîke (DBP) seba park Taxa Bagcilarî de bêro akerdiş waşt ke nameyê ci bibo "Parkê Ceylan Onkole". Seba nê çîyî zî pêşnîyaznameyê nuştekî ame pêşkêşkerdiş. No nêame qebulkerdiş. 

 

Serra 10ine ya serrgêra qetilkerdişê Ceylane de rojnamegere û resame Zehra Dogane serra 2019î de kuçeyê Londonî de resimê Ceylane xêz kerd.