AMED - Parlamentera Partîya Çep a Keske Zeynep Oduncuye bale ant serê girankerdişê tecrîdê serê Rayberê PKKyî Abdullah Ocalanî û vat: “Ma tîya ra reyna veng kenê ke ganî bi lezkî muzakere bêro destpêkerdiş. Berê hêvîye yê şarê Kurdistan û Tirkîya Îmrali yo.” 

 

Tecrîdê serê Rayberê PKKyî Abdullah Ocalanî roj bi roje giran beno. Kişta nê tecrîdî de problemê komelî zî her ke şino zêde beno. 30 aşmî yo Abdullah Ocalanî ra xeberêke çin a û her çend ke avûkat û keye muracat bikerê zî bi bahaneyê vengan cewabêk nîno dayîş. Parlamentera Êlihî ya Partîya Çep a Keske Zeynep Oduncuye dîyar kerd ke xorîbîyayîşê krîzê komelî zî bi tecrîdî reyde girêdayeyo û vat ke çareserî bi destpêkerdişê pêvînayîşî bi Îmraliyî reyde mumkun o. 

 

'Ma nêeşkenê qalê demokrasî bikerê' 

 

Zeynepe ard ziwan ke Tirkîya nika rewşêke binkewtişî de ya û bale ant serê pêvînayîşê ke mabenê serranê 2013 û 2015î de bi Rayberê PKKyî Abdullah Ocalanî reyde ameyî kerdiş û vat: “Bi pêvînayîşê prosesê aştîye reyde şarê Tirkîya nefesêk girewt. Na rewşe tesîrêk pozîtîf şarî ser de kerd û asayîş ard. Semedo ke dewlete fek polîtîkayê şerî yê hukmatî ra vera nêdana û şer de israr kerd, prosesê aştîye binkewt. Dimayê binfînayîşê prosesê aştîye nika ma nêeşkenê Tirkîya de qala demokrasî bikerê. Ma nika proseso ke huqûqê dewlete çin o û muhakeme bi temamî siyasî têgêreno ciwîyenê de yê.”

 

'Bêhuqûqîyêk ke tesîrê xo her ca ser de keno, esto'

 

Zeynepe da zanayîş ke bingehê heme krîzê Tirkîya çaresernêkerdişê problemê kurdî yo û vat: “Ma proseso ke Tirkîya de waştişê şarê kurdî nînê munaqaşakerdiş, nînê qiseykerdiş û yenê peygoşkerdiş ra derbaz benê. Sebebê tewr gird ê krîzo ke Tirkîya de yeno ciwîyayîş, tecrîdê Îmraliyî yo û tecrîd vilayê heme zîndanan bîyo. Yanî tecrîd tena Îmraliyî de nîyo, ewro heme vilayê heme zîndanan bîyo. Çi heyfo ke ewro her roje zîndanan ra xebera mergê tepişteyê nêweşî û tepişteyê ke înfazê înan ameyo veşênayîş yena. Caardişê sey dewaya Kumpasî yê Kobanê bêhuqûqîyê ke yenê kerdiş mojneno ma. Eke tecrîdê Îmraliyî bêro peynîkerdiş û bi Birêz Abdullah Ocalano ke muxatabê çareserîye yo reyde pêvînayîş bêrê kerdiş, do atmosferê aştîye reyna pê bêro."

 

'Prosesê çareserîye eşkeno reyna bidîyo destpêkerdiş' 

 

Zeynepe dîyar kerd ke destur nîno dayîş ke Rayberê PKKyî Abdullah Ocalan ne bi keye û ne zî bi avûkatanê xo reyde pêvînayîş pê bîyaro û da zanayîş ke no 30 aşmî ra zêde yo ke tu xeberêke nîna girewtiş. Zeynepe dewamê qiseykerdişê xo de vat ke no nizdîbîyayîşêk bêhuqûqî yo û dewam kerd: “Seba raştkerdiş û derbazkerdişê krîzê Tirkîya ganî her çî ra ver tecrîdê Îmraliyî peynî bibo. Lazim o demêk lez de bi keye û avûkatanê xo reyde Birêz Abdullah Ocalan pêvînayîş pê bîyaro. Bi raştî zî lazimîya şarê Kurdistanî bi mesaj û vengê Birêz Ocalanî esta. Îqtîdarê AKP-MHPyî bi şero ke dayî rayîr ra berdiş bîyayîşê xo dewam kenê. Îqtîdar polîtîkayê şerî yê feqîrî rayîr ra beno û butçe şerî rê cîya keno. Na rewşe de ma eşkenê vajî ke eke tecrîdê Îmraliyî bêro wedaritiş û bi Îmraliyî reyde muzakere bêrê kerdiş, derheqê tepişteyê ma yê siyasî yê zîndanan de zî do game bêra eştiş. Eke fek polîtîkayê şerî ra biverdê do ekonomî baş biba û aştî bêra Tirkîya. Ma bawerîya ke lazimî bi prosesêk nefesgirewtişî esta de yê.” 

 

'Ma amade yê ke gamê laziman bierzê’ 

 

Zeynepe wina dewam kerd: “Sey Partîya Çep a Keske bado ke tecrîd raşte ra wedarîyo, ma do seba peynîkerdişê krîzê zafhetin yê Tirkîya dest bi eştişê gamê laziman bikerê. Nika Tirkîya de edalet çin o. Ma do na çarçewa de sey Partîya Çep a Keske bi şarê xo reyde binê banê parlamentoye de heme xebatê ferzan bidê destpêkerdiş. Îqtîdarê AKP-MHPyî nê demê peyênan de heme rayîrê çareserîye xetimnayî. Do nêeşkê bi polîtîkayê xo yê hemverê şarê Kurdî, nê şarî waştişanê ci ra dûrî bikerê. Ma vanê ke îqtîdar nêeşkeno bi qirkerdişê kurdan, bi hewldayîşê çinîkerdişê ziwan û kulturê înan û bi fînayîşê zîndanan kurdan çinî bikero. 40 serrî yo seba nê çîyî hewl danê. Ma hukmatî rê eşkera û zelal vanê; şima bi înkaro ke kenê, nêeşkenê ser bikewê. Çike şarê kurdî fek ziwanê xo, kulturê xo, cuya xo û raştîya xo ra vera nêdano. Ewro şima cenazeyê tutanê şarê kurdî qutîyan de şirawenê. Ma nê polîtîkayan qebul nêkenê.” 

 

Raştîya Îqtîdarî 

 

Zeynepe qiseykerdişê xo yê peyênan de wina vat: “Yewine canêardişê waştişê baro, avûkat, hemserekê ma û hewldayîşê ma yê seba pêvînayîşê Îmraliyî, no yo ke îqtîdar kaosî ra wayîr beno. Nika resayo peynîya nê caardişanê xo yê bêhuqûqîyan. Ê Tirkîya mîyanê krîzêk gird de verdayî û hayîya înan çîyê ke xo pey de verdayî ra çin o. Ma reyna tîya ra veng kenê ke ganî bi lezkî muzakere bidîyo destpêkerdiş û berê hêvîye yê şarê Kurdistan û Tirkîya Îmrali yo.”