Rabîa Onver

 

COLEMÊRG - Dewa girêdayeyê Şemzînanî de 3 kesan tecawuzê Esra Y.ye kerd û aye antî qeraxê xokiştişî. Merdimê Esraye dîyar kerdî ke melayê dewe û keya wazenê sucê 3 kerdoxan bêro nimitiş û vatî ke zextê serê keyeyê înan bi serran o dewam keno. 

 

27ê Gulana 2016î de dewa qezaya Şemzînanî ya Colemêrgî de 3 kesê bi nameyê Veysî, Zahir û Nîhat Yilmazî destdergê bi Esra Y.ya 11 serrî kerdbî. Çarçeweya prosesê huqûqî ya ke tute merdimanê xo rê qala qewimîyayîşî kerd de 3 kerdoxî ameyî tepiştiş, dewa Mehkemaya Cezaya Girane ya Geverî de ame dîyîş. Seba 3 kerdoxan sucê ‘îstîsmarê cînsî’ û ‘bêparverdayîşê azadîye’ ra her yew kesî rê 42 serrî cezaya zîndanî ameye dayîş. Avûkatê kerdoxan muracatê Mehkemaya Edlîyeya Herême ya Wanî kerd ke ceza bêra xeripnayîş. Badê îtîrazê hêrişkaran ê Mehkemaya Îstînafî ya Herême, ceza ameye betalkerdiş û seba hêrişkaran qerarê muhakemekerdişo newe ame dayîş. La 8 aşmî ra tepîya nê kesî bi bi bahaneyê ‘çinîbîyayîşê delîlan’ serbest ameyî verdayîş. Bado ke kerdoxî ameyî tehlîyekerdiş 11 roje ra dima Esraye ancîya verê xokiştişî. Serbestverdayîşê nê kesan bî sebebê xokiştişê Esraye. Bado ke Esraye ver bi întîxarî ameye antiş, dewijî raşteyê cuye keyeyê Esraye rê teng kerd. 

 

Merdimê Esraye çîyê ke ameyî ciwîyayîş vatî. 

 

Kerdoxan pawenê 

 

Merdimê Esraye dîyar kerdî ke avûkatê kerdoxan Mehmet Ekiciyî seba ke gerreyê xo tepîya bianco pîyê Esraye rê israr kerdo û vatî: “Mele û keyayê dewe her reye kombîyayîş viraştêne û seba ke pîyê Esraye gerreyê xo tepîya bianco israr kendêne, çimê ci tersnayêne û keye tehdîd kerdêne. Her roniştiş ra ver kombîyayîş viraştêne û kerdox ameyêne pawitiş.” 

 

Mele û keya kerdoxan pawitêne 

 

Merdimê Esraye dayî zanayîş ke mele û keya vatêne ‘tute merda şenik a, zuran kena’ û keye û tute sucdar kerdêne û wina vat: “Mele û keya dewe de mehkema viraştêne û mele vatêne kam ke sond bido o/a raşt vano/a. Na mehkema de kerd û Esraye sondî werdî la sondê kerdoxan ra ame bawerkerdiş. Esraye ame hedefgirewtiş. Keya û mele dîn şixulna û kerdoxan pawitî.”

 

Kerdox bi def û zirneyan ameyî pêşwazîkerdiş 

 

Merdimê Esraye dîyar kerdî ke dimayê çend roniştişan meleyê dewe keyeyê Esraye rê vato ‘Şo gerreyê xo tepîya biance. Nameyê nê ciwanan bi tecawuzî mevejnêne’. Sewbîna wina vatî: “Seba her kerdoxî keye ra 100 hezar TL ameyo waştiş. Heta kerdox nêrê tepiştiş do verê çimanê dewijan de sey kerdox bêrê asîyayîş. Wexto ke kerdox zîndan ra vejîyayî bi def û zirneyan ameyî pêşwazîkerdiş. Esraye hetê psîkolojîye ra nê çîyan ra tesîr bî.”

 

Qerar mele û keya danê 

 

Merdimê Esra dayî zanayîş ke wexto ke Esra dinyaya xo bedelnaye keyayê dewe pîyê ci gêrayo û vato, "Bêre kênaya xo bigîre bi bêvengî aye defin bike, xor komêke este ya. Ti se kenê bike.” Sewbîna vatî: "Bi nê rengî dejê keyeyî vet di qat. Mele û keya vatî cenaze meyarê camî, wexto ke şima ameyî şima eşkenê o wext bîyarê. Keya, mele û welatijê dewe hemverê keyeyê Esra vejîyayî. Ê seba Esra nê seba versucan şuxulênê. Keyeyî seba tehdîdî û zextê bi serran gerreyê xo peyser ant. Keyeyî dîyar kerd ke wexto ke versucê şêrê do dewe de aştî virazîya. Labelê meleyî vat eke versûcî şêrê seke do sûcê xo qebûl bikerê." 

 

Vernîya her roniştişî tehdîdê mergî 

 

Merdimê Esra da zanayîş ke bi 7 serrî yo vernîya her roniştişî tehdîd keyeyî rê yeno kerdiş û vatî: "Bi hewt serrî yo keyeyê Esra hetê keyeyê versûcan, dewijan yenê sûcdarkerdiş. Pîyê Esra nêeşkeno şêro camî. Nêeşkeno heywananê xo biçêrêno, beno dewanê cîranan. Vernîya her roniştişî tehdîdê mergî keyeyî rê yeno kerdiş.”

 

7 serrî yo xo ver danê 

 

Merdimş Esra dayî zanayîş ke verê zî çîyê bi nê rengî dewe de qewimyayî labelê keya û mele hedîse bi pereyan nimitê û wina vat: "Keya û mele dimayê Esra ver bi întixar ra ameya antiş, keyeyê Esra sûcdar kerdê û vatê seba şima name wina vejêno. Pêwa zextî bi 7 serrî yo têkoşîn dewam keno. Ma do taqîbkerdoxê dewa bibê." 

 

Avûkatê versûcan xo dewa ra antî 

 

Parlamentera Partîya Çep a Keske ya Colemêrgî Oznur Bartin bi pêşnîyaznameyê pêşkêşê meclîsî kerd dima Wezareta Xizmetê Komelî û Keyeyî waşt bi keyeyê Esra reyde pêvînayîş bikero. Avûkatê versûcan û Serekê AKPyî yê Bajarî Zeydin Kaya serê hesabê xo yê medayaya dîjîtale de neql kerd ke ê dewa ra xo antê.