AMED - MED TUHAD-FEDî seba kongreya bi sloganê ‘Bi ruhê serewedaritişî ma do tecrîd birijnê’  Amed de bêro organîzekerdiş, veng da.

 

Federasyonê Komeleyê Paştdayîşê Keyeyê Tepişteyan (MED TUHAD FED) bi sloganê ‘bi ruhê serewedaritişî ma do tecrîd birijnê’ do 30e êlule de Demîr Otelî de dîyîn kongreyê xo ya îstîsnayî pê bîyara.

 

Verfeka MED TUHAD-FEDî Emîne Kaya û endama komeleye Safiye Akdag, bale antî serê tecrîdê Rayberê PKKyî Abdullah Ocalanî û venga wayîrvejîyayîşê zîndanan kerd.

 

Emîne Kaya derheqê kongreye de qisey kerd û wina vat: “Derheqê kongreye de ma keyeyê tepişteyan zîyaret kerd. Ma şî serdayîşê sazgeh û partîyê sîyasî. Ma pêşnîyazîyê înan girewt. Di aşmî xebatê ma dewam kerd. Hetê mexdûriyetî zaf giran bî. Dadgehe ceza birnena la dadgerî eşkena xira bikera. Heta o wext xeylêk embazê ma tepişte manenê. Embazêke ma ya ciwane estbî. 21 serrî bî, cigêrayîşê zitî ci rê kerdibî. No seba aye û keyeyê aye çîyêk giran bi. Ganî no nêro normalkerdiş. Ganî ma pêro serê na rewşe de vinderê. Ma do bi îdarekarîya xo ya newe reyde xebatanê xo dewam bikerê. Ma venga tewrbîyayîşê kongre her kesî kenê.”

 

Tecrîd dewam keno

 

Safiye Akdag da zanayîş ke ganî her kes hemverê tecrîdî de vengê xo berz bikero û wina vat: “25 serrî verê komploya mîyanneteweyî dest pêkerd. Tecrîdê serê Birêz Ocalanî 25 serrî yo dewam keno. Tecrîd tesîr serê pêro raşteyî kerdo. Ganî ma hemverê bêhuqûqî vera tecrîdî vengê xo berz bikerê û wayîrê tepişteyan vejîyê.” 

 

Safîye tewr peyîn wina veng da: “Ez pêro şarê ma dawetê kongre kena. Ma do 30ê êlule roja şemeyî saete 10.00ine de Demîr Otele de kongreya xo bikerê. Ameyîşê şima do ma keyfweş bikero.”