Rabîa Onver

 

COLEMÊRG - Merdimê tepişteyan derheqê binpaykerdişê heqan ê demê peyîn de zîndanan de zêde bî de qisey kerdî û waştî ke polîtîkayê teda, tecrîd û îşkence peynî bibê û her kes hemverê nê bêhuqûqî bikewê tevger.

 

Netîceyê polîtîkaya îqtîdarê AKP-MHPyî de binpaykerdişê heqan yeno kerdiş û bi tecrîdî zîndanî açaryayê merkezê îşkence û merdişî. Pêwa asayîşê canê tepişteyan bi qanûnî kewenê binê asayîşî zî tepişteyî bi mergî reyde yenê rî bi rî. Bi sebebê kêfî yê Sazgehê Îdare û Taqîbkerdişî sere de tepişteyê nêweşî tahlîyeyê bi hezaran tepişteyan yeno astengkerdiş. Netîceyê nê binpaykerdişan de keyeyî zî bi tepişteyan reyde yenê cezakerdiş. Seba sebebê ke surgunî zîndanê dûrî yenê kerdiş, keyeyî hetê ekonomî û manewî de zehmetîyan ancenê.

 

Merdimê tepişteyan derheqê tecrîdî de qisey kerdî û dîyar kerdî ke ganî polîtîkayê tecrîdî peynî bibê.

 

‘Çîyo ke tepişte û keyeyan yeno kerdiş îşkence yo’

 

Emîne Atak da zanayîş ke kênaya aye 6 serrî yo zîndanê Kandirayî de ya û seba dûr a nêeşkena şêra pêvînayîşî û wina vat: “Ez wazena kênaya mi Neclaye bîyarê cayêk nêzdî. Seba nê mi xeylêk rey waştişname da. La negatîf netîce bi. Ma Gever de manenê. Ma di serrî ra reyke eşkenê şêrê pêvînayîş. Îmkanê ma çin ê. Canê m veşeno. Hişê ma her tim uca de yo. Tepişteyan rê îşkenceyan kenê. Hewtegê reyke telefon kenê û no zî 10 deqe yo. Çîyo ke ma û tepişteyan rê yeno kerdiş, îşkence yo.”

 

Êdî bes i!

 

Emîne dîyar kerd ke zîndanan de her tim binpaykerdişê heqan yeno ciwîyayîş, gardiyan her tim zextan kenê û wina vat: “Ez nêweş a. Seba kênaya xo bivînî rayîrê dûrî de şina la pêvînayîş saetêke yo. Hîna saetê ma temam nêbenê, ma zerre ra vejenê. Heta ma kewenê zerre, xeylêk reyan cigêrayîş kenê. Gardiyanî nêbaş têgêrenê. Homa zano zerre de bi tutanê ma se kenê? Êdî bes o. Wa no zulm peynî bibo.”

 

Qedexeyê telefonî

 

Mehsîma Yaşar zî dîyar kerd ke hem kênaya aye, hem zî lajê aye tepişte yo û zîndanan de polîtîkaya cîya yena rayîr ra berdiş û wina vat: “Zextê serê tepişteyan her ke şino zêde beno. Zîndanan de heqê cuye, tepişteyan rê nêverdayî. Ne qanûn ne edelet bi nê hukmatî de mendo. Bi çimsûrî têgêrenê. Kênaya mi seba deyîra kurdî vata, qedexeyê pêvînayîşê telefonî yê aşmêke dayî.  Ez venga pêro kesan kena. Wa hemverê nê zulmî de bêveng nêmanê. Zîndanî keyeyê mergî nîyê. Her di tutê mi zî zîndanan ra dûr ê. Ma nêeşkenê şêrê. Yew Elezîz yew Trabzonî de yo. Ganî her kes hemverê nê zulmî de vengê xo berz bikero.”