Rojda Aydin

 

WAN - Serra 2020î de 5 camêrdî qezaya Bêgirîyê de tecawuzê tutêke kerdbî û derheqê înan de tehqîqat dîyabî destpêkerdiş. Netîceyê tehqîqato ke dîya destpêkerdiş de îdianame ame amadekerdiş û di roniştişê dewaye ameyî dîyîş. Roniştişê 3ine yê dewa do 30 Teşrîna Peyêne de bêro dîyîş. Roniştişê ewile yê dewaye de 5 kerdoxan ra 2 tenî ameyî tehlîyekerdiş û vera waştişê avûkatê tute yê tepiştişê kerdoxan roniştişê 2ine de zî kerdozê nêameyî tepiştiş. 

 

Qezaya Bêgirî ya Wanî de aşma çeleyî de vejîyabî raşte ke 5 camêrdî bi hawayêkê sîstematîk tecawuzê tutêke kerdî. Tuta ke serra 2020î nata hetê kerdoxê bi nameyê Emrah Enterlî, Farûk Çelîkdere, Firat Başak, Mesût Menteş û Onder Ozerî ra bi hawayêkê sîstematîk bi tecawuz û şantajî reyde rî bi rî manena, 5ê Çeleyê 2023yî de şî Mudirîya Polîsan a Bêgirî û gerre kerd. Dimayê gerreyê tute 5 kesê ke ameybî destbendkerdiş 4ê înan hetê Mehkemaya Cezaya Sulhî ya Bêgirîye ra 7ê Çeleyî de ameyî tepiştiş. 

 

Bi hawayêkê sîstematîk tecawuz 

 

Dimayê gerreyê tute îfadeyê kerdoxan ame girewtiş. Tute ard ziwan ke kerdox Faruk Çelîkdede serra 2020î ra nata tecawuzê aye kerdo û derheqê Mesut Menteşî de zî vat ke o wayîrê salonê sporî yo û serra 2022yî de aşmanê mabenê Nîsan û Gulane de hetê ci ra raştê hêrişê cînsî ameya û hewldayîşê tecawuzî reyde rî bi rî menda. Sewbîna tute dîyar kerd ke Mesut Menteşî hûmarê aye dayo kesêk bi nameyê Onder Ozerî û aşmanê mabenê Gulan û Hezîrane de herêma Unselî ya qezaye de tecawuzê aye kerdo. 

 

Kerdoxî yewbînan şinasnenê 

 

Sewbîna ame zanayîş ke kerdox Firat Başako ke lîseyo ke tute tede wendêne de mamosteyê cereyanî bî zî hewl dayo tecawuzê tute bikero. Tute da zanayîş ke kerdox Emrah Enterlî zî aşmanê Êlul-Teşrîna Verêne de bi rayîrê medyaya dîjîtale xo resnayo aye û vat ke hetê nê kesî ra zî raştê tehdît û şantajî ameya û bi hawayêkê sîstematîk bi tecawuzî reyde rî bi rî menda. Tute dîyar kerd ke kerdox Onder Ozer, Emrah Enterlî û Firat Başakî embazê yewbînan ê. Tute tecawuzê sîstematîk û şantajî vera derheqê kerdoxan de muracaatê sucî kerd. La kerdoxî îfadeyê xo de tecawuz red kerdî û îdia kerdî ke înan tecawuzê tute nêkerdê û şantaj bi aye nêkerdê.

 

Rapor de tecawuz vejîya raşte 

 

Badê gerreyo ke ame kerdiş raporê muayeneyê nêweşxaneyî de zî ame dîyarkerdiş ke tute bi tecawuzî reyde rî bi rî menda û no zî îfadeyê tute tesdîq keno. 

 

2 kerdoxî serbest ameyî verdayîş!

 

Eynî wext de ame zanayîş ke 4 kerdoxê ke ameyî tepiştiş ra Faruk Çelîkdede û Onder Ozerî 28ê Nîsane de serbest ameyî verdayîş.

 

 Îdianame ame amadekerdiş 

 

Dimayê tehqîqato ke dîya destpêkerdiş 13ê Adare de derheqê kerdox Emrah Enterlîyî de bi sucdarîya “Şantaj, Hêrişê cînsî yê hemverêm tute, Binpaykerdişê heqê cuya taybetî”, derheqê kerdox Faruk Çelîkdere û Onder Ozerî de “hêrişê cînsî yê hemverê tute”, derheqê kerdox Firat Başak û Mesut Menteşî de zî bi sucdarîya “Hêrişê cînsî yê hemverê tute, destfînayîşê dayeyê şexsî bi hawayêkê bêhuqûqî” îdianame ame amadekerdiş. Îdianameyo ke ame amadekerdiş de ame waştiş ke kerdoxî bêrê cezakerdiş.

 

Di roniştişî ameyî kerdiş

 

Îdînameyê ke Dadgeha Cezaya Giran ya Erdîşî rê ame şirawitiş, ame qebûlkerdiş. Roniştişê dewaya yewin 22ê Hezîrane de Dadgeha Cezaya Giran ya Erdîşî de ame vînayîş. Roniştişê ewilî de kerdoxan îdayê derheqê xo de red kerdî. Roniştişê 2yîn ke 14ê êlule de Dadgeha Cezaya Giran ya Erdîşî de ame vînayîş de zî kerdoxan reyna red kerd. Eynî wextî de roniştiş de avûkatê tute zî dîyar kerdî ke keyeyê kerdoxan seba tute gerreyê xo peyser anta, teda tute rê kenê û seba nê reyke bîn waştişê tepiştişê kerdox Farûk Çelîkdere, Onder Ozer û Mesût Menteş ke ameyê tahliyekerdiş kerdî. Roniştişê 3ine 30ê teşrîna peyêne de yo. Heyetê dadgehe waştişê avûkatanê tute red kerd û dewa taloqê 30ê teşrîna peyêne kerd.”