Zelal Tunç

 

WAN - Endama Komeleya Cinîyan a STARî ya Wanî Rojbîn Bore bale ant serê reaksîyonê şarî yê Wanî ke hemverê çawişê pisporî de ame mojnayîş û vat: “Bado ke şar reaksîyon mojna hedîse vejîya raşte. Semedo ke kerdox bêceza yenê verdayîş şar bi xo edaletê xo pê ano.” 

 

Raşteyê Maraşî yê qezaya Rayîrê Armuşî ya Wanî de ame dîyarkerdiş ke 6 çawişê pispor di cinîyan tacîz kerdî. Goreyê malumatanê ke esnafan ra ameyî girewtiş, 6 çawişê pispor yê serxeş ke cayê werdî de werd werdêne, mabenê xo de munaqaşa kerdî û wayîrê cayê werdî zî dikanê xo ra çawişan eşto teber. Çawişê ke wayîrê dikanê werdî înan eşto teber dima ra zî di cinîyan tacîz kerd û şar zî reaksîyon mojnayo înan. Çawişê pispor yê ke heqaretê şarî kerdî zî reaksîyon mojnayî û hêrişê înan kerdî. 

 

Çawişê pispor ê ke şar hêrişê înan kerd, dima ra cayêk ke alkol tede ameyêne rotiş de nimitî. Şar reaksîyon mojna û sloganê ‘Kelepçe’ ‘Leşker ver bi Cepheyî’ û ‘Yuh’ berz kerdî. Bado ke hedîse gird bî xeylê polîs, wesayîtê zirxî û ambulansî ameyî cayê hedîse. Bado ke reaksîyonê şarî gird bî polîs nê çawişê pisporî destbend kerdî. 

 

Reaksîyonê hemverê hedîseyî dewam keno. Komeleya Cinîyan a STARî ya Wanî waşt ke eşkerayî bida la hetê polîsan ra ameye astengkerdiş. Vera astengîyan zî cinîyan eşkerayî da û reaksîyonê xo nîşan da. Endama komeleye Rojbîn Bore ajansê ma JINNEWSî rê qisey kerd. 

 

Polîtîkayê şerê taybet 

 

Rojbîne da zanayîş ke nê welatî de şîdetê hemverê cinîye vejîyayo merheleya tewr cor û vat: “Nika şeklê şîdetî bedilîyayo. Polîtîkayê şerê taybet raşteyê cemawerî û raşteyan de yeno rayîr ra berdiş. Tewr peynî bajar de tacîzê çawişê pispor vejîya raşte. Tena ewro nê ma bîyî şahidê pratîkê çawişê pisporan. Merdim eşkeno xeylê nimuneyan bido. Di roje verê cû bajar de tacîz pê ame. Semedo ke çîyêk nîno kerdiş ê bi cesaret vejîyenê raşteyan.” 

 

Rojbîne dîyar kerd ke serra 2015î ra heta nika Kurdistan de şîdet bi "unîformayî" yeno kerdiş û wina dewam kerd: “Zewecnayîşê cinîya ciwane ya bi çawişê pisporî reyde, walîtî vatbî 'Têkoşînê ma bi terorî reyde wina yo'. No çî mojneno ke hewldayîş bi kam cû nîyetî yeno kerdiş. Cinîyê kurd sey mevzî û sey ganîmetî yenê dîyîş."

 

Pawitişê kerdoxan 

 

Rojbîne, qiseykerdişê xo de wina bale ant serê hedîseya ke Wan de vejîya werte: "1ê teşrîna verêne de Wan de 6 çawişê pisporî kuçe de 2 cinîyan taciz kerd û şarî reaksîyon vera înan mojna. Dimayê ke nê 6 kesî vatî ma çawişê pispor ê, çeka ma esta û vatişê nîjadî kerdî, şarî reaksîyon mojna. Ma terefgirê lîncê nîyê. La seba ke edalet pê nêro û kerdoxî yenê pawitiş, şar hewl dano ke edaletê xo pê bîyaro. Mûsa Orhan, Talîp Korhan, Alparslan Akbudaga eke biameyîne muhakemekerdiş, ewro nê çî nêvejîyayîne werte.”  

 

Eşkerayîye ameye astengkerdiş 

 

Rojbîne, dîyar kerd ke hemverê hedîse waştê verê komeleye de eşkerayîye bidê lapolîsan seba pankartî astengî vetê. Rojbîne wina vat: "Walîyê Wanî 6 û 7 serrî yo bi kêyfî çalakîyê ke pê yenê asteng keno. Çend agahîya înan eşkerayîye ra estbî zî dorê ma ablûqa kerdî û waştî eşkerayîya ma asteng bikerê. No çî yeno manaya pawitişê kerdoxan. Dimayê reaksîyon û hewldayîşê ma yê saetêke nîm ma eşkerayîya xo da. Polîsan dest da serê pankartê ma. Seba ke bêceza yenê verdayîş ewro bi rihetî kuçeyan de sûc kenê." 

 

Rojbîn Bore, qiseykeedişê xo wina qedêna: "Bi taybetî ez venga cinîyê ciwanan ê Kurdistanî kena. Hemverê hedîseyê winasî de aya bibê.”