MERKEZÊ XEBERAN - Dewleta tirkan vizêr Vakur û Rojhelatê Sûrîye, dewe, îstasyonê ceyranî, bîrê awe û petrol zî mîyan de 40 herêmî hedef girewtî. 

 

Dewleta tirkan vizêr Vakur û Rojhelatê Sûrîye de xeylêk herêmî bi teyareyî bombavaran kerd. Goreyê xebera Ajansê Xeberan ê Hawarî (ANHA), dewleta tirkan mîyanê 24 saetan de 40 herêmî hedef girewtî. Mîyanê nê herêman de xeylêk dewî, 3 îstasyonê ceyranî, 2 bîrê awe û îstasyonêk benzînî esto. Hêrişan de 6 welatijî û 6 endamê Hêzê Asayîşê Zerreyî dinyaya xo bedelnayî. Semedê hêrişan xeylêk îstasyonê gazî, petrol û awe êdî nêeşkenê xizmet bidê.