AMED - Mevlîde Gedîzmenlere bi mêrde û di tutanê xo reyde semedo ke raşteyan de kincan nêroşa, Baglarê Amedî de dikanêke kincan akerd û bi nê dikanî îdareyê xo kena. 

 

Krîzê ekonomî cuya heme kesan ser de negatîf tesîr virazeno. Cinîyê ke krîzî ra tesîr benê, têkoşînê cuye danê. Cinîyan bi nameyê Mevlîde Gedîzmenlera ke nê krîz û zextê komelî ra tesîr bîya, qet fek têkoşînê xo ra vera nêdaya. Mevlîde bi 2 tutanê xo reyde raşteyan de kuçe bi kuçe gêrayêne û kincan rotêne. Nika Mevlîdeye dikanêk akerd û uca de xebetîyena. Ekonomîya xo bi no hawa dest fînena.

 

‘Ma nêeşkenê îdareyê xo bikerî’ 

 

Mevlîdeya ke bi rotişê kincan îdareyê xo kena qiseykerdişê xo de wina vat: “Sere de mi raşteyan de kincan rotêne. 5-6 aşmî mi wina dewam kerd. Dima ra mi dikan akerd. Keyeyê mi kîra yo. Di tutê mi estê. Ma nêeşkenê îdareyê xo bikerê. Dikan de zî rojêk kar baş o, roja bîn xirab o. Ge-ge ma serê sibayî ra heta şewe nêeşkenê çîyêk biroşê. Mêrdeyê mi verê cû lokanta de xebetîyayêne. Nêweş kewt. Nêweşîya xo vera kar ra ame eştiş. Dima ra ma bazar de dest bi rotişê kincan kerd. Ma ewnîyayî nêbeno ma erebokêk seyar girewt û ma kincan wina roşenê.”

 

‘Binê roje de bi di tutan reyde no kar zehmet o’ 

 

Mevlîde dewam de wina vat: “Ma serê sibayî saete 08.00 de vejîyayîne, şan de heta 19.00 de şuxulîyayîne. Bi mêrde û tutanê xo reyde vejîyayîne.  Bi di tutan reyde kar zaf zehmet bî. Binê roje de zor bî. Seba dayîk û pîyê ma çin ê, kes çinbî biewnê tutanê ma ra. Seba nê mi xo reyde berdêne. Ma dikanêke dî. Bi aşmêke û nîm o ma akerdo. Reyan badê 5ine dikan padana û kuçeyan de cilan roşena. Ez karê xo ra kêfweş a. Tu wext şerm nêkena. Ez bi karê xo serberz a. Her çî vaye yo. Debare zehmet a. Kîra zî 10 hezarî ra dest pêkenê.” 

 

Ti cinîya keyeyê xo de roşe! 

 

Mevlîde wina qedêna: “Ma cinî seba cinsîyetê xo xeylêk zextan reyde yenê rî bi rî. Kuçeyan de demo ke mi cilî rotêne her kesî vatêne tu cinî ya nê karî meke. Vatêne tutanê xo rê biewne. La mi şerm nêkerd. Mi tu wext xo nêda kîşte. Ez venga pêro cinîyan kena. Şerm mekerê serê linganê xo de vinderê. Hewceyê mêrdeyî mebê."