Mîdye Miqted

 

HELEB - Vera Komployê 9ê Teşrîna Verêne dezgeh û komeleyê cinîyan çalakîya xeymeronayîşî pê ardî û komployê 9ê Teşrîna Verêne şermezar kerdî. Cinîyan vat: “Dewleta tirkan bi hêrişan wazena ma fikrê Rayberê PKKyî Abdullah Ocalanî ra dûrî bikero. La ma do bi têkoşînê xo îşxalkerdiş çinî bikerê û azadîya rayberê xo meşru bikerê.” 

 

Kongra Star, Merkezê Kevana Zêrîn, Yewîya Cinîyê Ciwan û Merkezê Cigêrayîşê Jineolojîye bi çalakîya xeymeronayîşî Komployê 9ê Teşrîna Verêne şermezar kerdî. Cinîyê ke çalakîya xeymeronayîşî pê ardî, Endama Kordînasyonê Kongreya Starî Nêrgiz Bekir, Îdarekara Merkezê Kevana Zêrîn Tizyal Çawîş û Îdarekara Meclîsê Şehîde Şîlan Kobanê Role Mihemede derheqê çalakî û Komployê 9ê Teşrîna Verêne de ercnayîş kerdî. 

 

'Çalakîya ma do dewam bikera’ 

 

Endama Kordînasyonê Kongra Starî Nêrgiz Bekire muhîmîya çalakîye ard ziwan û wina vat: “Ma çalakîya xo seba di rojan vera Komployê 9ê Teşrîna Verêne de pê ard. Çalakîya ma mîyan de Kongra Star, Merkezê Kevana Zêrîn, Yewîya Cinîyê Ciwan û Merkezê Cigêrayîşê Jineolojîye û qomîteya amedekare ca girewt. Mîyanê çalakîya ma de aktîvîteyê şenik zî ameyî viraştiş û çalakîyê ma heta ke komplo peynî nêbo do dewam bikerê."

 

'Ma cuya xo goreyê fikrê Rayberî dewam kenê’ 

 

Dewamê qiseykerdişê xo de Nergîze bale ant serê Komployê 9ê Teşrîna Verêne û vat: “No bî 25 serrî yo ke komplo serê rayberîyê ma de pê ameyo. Rayberê ma zî zîndanê Îmraliyî de xover dano. Semedo ke şarê bindest nêresê azadîya xo, dewletê mîyanneteweyî bi dayîşê zor û zextan yê serê Sûrîyeye de mecbur verdayî ke Rayber Sûrîye ra bivejîyo. Sewbîna waştî ke bi rayîrê vejîyayîşê rayberî yê Sûrîyeyê ra ma sey şarê kurdî çinî bikerî û dûrê fikrê rayberî bifînê. La ma cuya xo goreyê fikr û felsefeya Rayberî dewam kenê û xebatanê xo her hetî ra dewam kenê. Ma wazenê ke projeyê netewê demokratîke yê Rayberî pêşnîyaz keno vilayê pêroyê dinya bikerê.”

 

 'Bi çalakîyanê ma do azadîya rayberî meşru biba’ 

 

Peynîya qiseykerdişê xo de Nêrgize da zanayîş ke înan seba azadkerdişê rayberî çalakîyan pê ardî û wina vat: “Bi rojan o ma aktîvîteyanê xo dewam kenê û sewbîna zî ma hêzê xo şervananê azadîya Kurdîstanî ra gênê. Yê ke bi çalakîya xo ya fedayî zerreyê paytextê Tirkîya de cewabê dişmenî dayî, îspat kerdî ke ma estê. Eynî wext de ma sey şarê kurdî zî çalakîyanê xo serê esasê fikrê Rayberîye de dewam bikerê. La her çend ke dewleta tirkan hêrişanê xo serê ma de bida dewamkerdiş zî ma do xover bidê. Semedo ke ma xo serê fikrê rayberîye de aver berd.”

 

'Komplo seba ma roja sîya yo' 

 

Rayberîya Merkezê Kevana Zêrîn ra Tizyal Çewîşe zî wina û vat:"Çalakîya ma di rojan dewam kerd. Seba ma tena 15ê Sibate nê û seba ma destpêkerdişê komployê mîyanneteweyî 9ê Teşrîna Verêne roja sîya ya. Roja ke Rayberî mîyanê ma ra Sûrîye ra vejîya komplo dîya dest pêkerdiş. Ma zî nê komployî şermezar kenê û bi dewamkerdişê têkoşînê ma do azadîya rayberî meşru biba û eynî wext de ma azadîya xo azadîya Rayberîye de vînenê.”

 

'Bi tekoşînê ma planê dewletan çinî benê’ 

 

Sewbîna cinîyan ra rayberîya Meclîsê Şehîde Şîlan Kobanêye zî ajansê ma rê qisey kerd û da zanayîş ke eke têkoşînê cinîyan ra nêba do azadîya rayberî meşru nêba û vat: “Rayberê ma 9ê Teşrîna Verêne de Sûrîye ra vejîya û tecrîdê Îmraliyî bi serran o dewam keno. Amac kenê ke şar û rayberî yewbînan de bêrê birnayîş. La do amacê înan pê nêro û bi têkoşînê ma planê înan do têk şêrê. Bi rojan o ma reaksîyonê yê vera îşxalkerdişî mojnenê.”