Rojda Aydin

 

WAN - Hemsereka SESî ya Wanî Fîgen Çolakogluye problemê ke hetê weşîye de yenê ciwîyayîş ard ziwan û dîyar kerd ke kêmbîyayîşê doktoran ra bigîrê hera girewtişê randevuye, muayeneye ra bigêrêne heta temînkerdişê dermanan problemê cîdî estê û vat: “Têgêrayîşê hukmatî vera xebatkarê weşîye bi şîdetî reyde rî bi rî manenê.” 

 

Polîtîkayê weşîye yê hukmatî vera raşteyê weşîye de problemê şîdetin yenê ciwîyayîş. Hem kedkarê weşîye û hem zî hemwelatijî nê polîtîkayanê hukmatî vera mexdur benê. Nizdîbîyayîş û vatişê îqtîdarî vera kedkarê weşîye her roje şîdetî reyde rî bi rî manenê û fek gure ra verdenê. Coka ra zî hemwelatijî mexdur benê, nêeşkenê tedawî bibê û randevu bigîrê. 

 

Hemsereka SESî ya Wanî Fîgen Çolakogluye derheqê babete de qisey kerd û ard ziwan ke raşteyê weşîye de problemê girdî yenê ciwîyayîş.

 

 ‘Raşteyê weşîye de problemê cîdî estê’ 

 

Fîgene problemê ke raşteyê weşîye de yenê ciwîyayîş sey krîzê ekonomîye bi name kerd û vat: “Raşteyê weşîye de zî krîz xorî ra yeno ciwîyayîş. Krîz vera hetê resnayîşê kelepulanê weşîye de zî problem yeno ciwîyayîş. Hemwelatijî hetê randevu girewtişî de zî xeylê probleman ciwîyenê û nêeşkenê muayene bibê. No zî probleman gird keno. Raşteyê ortopedîye de xoresnayîşê kelepulan de problem esto. Xoresnayîşê dermanan zî problem o. seke şima zî zanî demê vîyarteyan de ma prosesê pandemî ciwîya û nika vernîya ma de zimistan esto. Demê peyênan de ma vînenê de janê cîyayî zî vejîyenê vernîya ma. Na rewşe ma dana fikirîyayîş û eşkerayîya Wezîrîya Weşîye zî esta. Ma her tim vanê ganî hetê weşîye bê pere bibo. No heqêq esasî yo. Verê cû zî krîzê ekonomîye estbî, la ewro no zêde bîyo û xoresnayîşê weşîye nika hîna zehmet bîyo. Coka ra ma vanê ganî xoresnayîşê weşîye bêpere bibo. Çike wezîfeyêk esasî ke bidîyo hemwelatijan ra yew zî no yo. La na nuqta de xeylê problemê ma yê cîdî estê.” 

 

 Kedkar ê, kole nîyê 

 

 Fîgene dîyar kerd ke binê nameyê bedilnayîşê weşîye de xeylê çîyî ameyî bedilnayîş û wina dewam kerd: “Nêweşxaneyê Bajarî cayanê dûrî de ameyî viraştiş. Awanîyê girdî ameyî viraştiş. Beno ke hetê dîyîşî de baş bo, la xoresnayîşê hemwelatijan zî hende asan nîyo. Nêweşxaneyê Bajarî nêweşxaneyê ke ti randevu bigêra, check-up viraza ra nîyê. Çike hûmara doktoran kêm a, tîya de tasfîyeyêk gird ame ciwîyayîş. Seke yeno zanayîş Unîversîteya Seserre ya Wanî (YYU) de embazêk ma yê weşîye şîdetî reyde rî bi rî mend. La semedo ke dezgeho ke ma tede xizmet kenê de wina fehmêk ameyo awankerdiş ke kesê ke amelîyat kenê ra bigîrê heta embazê doktorî pêro sey kole yenê dîyîş. Tabî ganî ma xizmetê şarê xo bikerê la ma kole nîyê. Polîtîkayê weşîye vera hemwelatij û xebatkarê weşîye ameyê vera yewbînan. Ganî qanûn de nuqtaya ke kedkarê weşîye pawena bêra viraştiş. Şima raştê şîdetî yenê, heta yenê kiştiş zî. La na merhela de tu qanûnêk çin o ke vernîya nê caardişan bigêro. Verê cû kes nêewtayêne wina doktoran bikuyo, la ewro bi asanî doktor yenê kuyayîş. Ma eşkenê vajê raşteyê weşîye cayêk xeylê zehmetin o. Sewbîna nêweşxaneyan de werdo ke yeno pewtiş nîno werdiş. Ma reaksîyonê xo anê ziwan. Senî xizmet wazenê ganî wina zî muhîmî bidê kedkaranê weşîye. No heqê ma yê esasî yo.”

 

 'Weşî sey haletêk siyasî yeno dîyîş’ 

 

 Fîgene dîyar kerd ke bajar de xeylê nêweşxane ameyî viraştiş la mîyanê înan nêweşxaneyan de xeylê beşî veng ê û kêmanîya doktoran esta. Fîgene bale ant problemê randevuyî ser û vat: “Nê semedî ra hemwelatijî nêeşkenê randevu bigîrê. Ma kêmanîyanê girdan ciwîyenê û hemwelatijî probleman ciwîyenê û nêeşkenê tedawî bibê. Ez eşkena na rewşe sey astengîyêk vera weşîye yê Nêweşxaneyê Bajarî biname bikera. Wexto ke nêweşxaneyê pîlot ameyî viraştiş zî ma tay îqazan kerdbî. Heto bîn de hetê hukmatê bîyaye ra sey argumanêk siyasî ame şixulnayîş. Wexto ke boyax bikerê weş asîyeno la wexto ke boyax piro şêro raştî vejîyeno raşte. Raşteyê weşîye de ma nê çîyan ciwîyenê.” 

 

 ‘Ganî raşteyêk asayî bêro awankerdiş’ 

 

Fîgene qiseykerdişê xo wina peynî kerd: “Doktor hetê asayîşî de probleman ciwîyenê. Hemwelatijê ke yenê nêweşxane bi fikrê ‘ganî biewnîyo mi û mecburo ke nêweşîya mi çareser bikero’ yenê. No zîhnîyetê îqtîdarî vera yo. Elbet ma seba xizmet bikerê tîya de yê û no xizmet xeylê pîroz o. Ma nê xizmetî ra hes kenê. Ganî seba kedkarê weşîye raşteyêk asayî bêro awankerdiş.”