ÇEWLÎG - Bi îstîmlaqkerdişî reyde yeno waştiş ke Wareyê Çapakçurî de baxçeyê mîlletî bêro viraştiş û semedê viraştişê baxçeyî talankerdişê xozaye qewimîyeno.

 

Îqtîdar semedo ke merdiman ziwan, kultur, huner û cografyaya înan ra durî bifîno, Kurdistan de polîtîkayê şerê taybetî rayîr ra beno. Çewlîg de serranê peyênan de şerê taybetî bi talankerdişê xozaye xo eşkera mojneno û hîna zêde yeno dîyîş. Hetê Îdareyê Konutê Komî yê Bajarî (TOKÎ) ra 2yê Êlula 2021î de Wareyê Çapakçurî de bi bedelê 64,4 mîlyon TLyî talankerdişê xoza dîya destpêkerdiş û projeyê ‘Baxçeyê Miletî yê Wareyê Çapakçurî û Karê Raştkerişê Dorme û Cêrzemînî Reyde Înşaatê Xemilnayîşî yê Sosyalî ke aîdê Baxçeyê Miletî yo’ kewt dewre. 

 

Qetlîamê daran 

 

 

Wareyê Çapakçurî de aşma nîsane ya 2023yî de qedîyayîşê Baxçeyê Miletî ameyêne plankerdiş la xebata talankerdişî dewam kena. Semedê viraştişê baxçeyî heta nika de bi seyan darî ameyî birnayîş û qetlîamê daran dewam keno. Nika 235 donim erdo ke semedê Baxçeyê Miletî ameybî cîyakerdiş ser de hema hema qet darî nêmendê. Heto bîn de barkerdişê darê ke yenê birnayîş zî dewam keno û herinda darê bi serran de çarçeweya projeyî de şitilê newe bêrê ronayîş. 

 

Wareyê Çapakçurî de newala ke awe herinkîyena ci binê nameyê ‘islahî’ de ameye betonkerdiş. Aşmanê hamnanî vera newale de awe bîbî kêmî û nika na newale bîya beton.