MERKEZÊ XEBERAN - Sereştişê keyeyan ê 9 bajaran de tewr tay 31 kesî destbend bîyî.

 

Operasyonê destbendkerdişî yê dimayê çalakîya 1ê teşrîna verêne ke hemverê Wezareta Karê Zerreyî amebî kerdiş, dewam kenê. Wezaretê Karê Zerreyî Alî Yerlîkaya dîyar kerd ke Riha, Mêrdîn, Wan, Semsûr, Îzmîr, Isparta, Meletî û Manîsa de bi îdiayê “endamîya rêxistine”, “hetkarîya rêxistine”, “propagandaya rêxistine” û “fînansekerdişê rêxistine” 27 kesî destbend bîyê. 

 

Amed de 4 kesî ameyî destbendkerdiş

 

Sereştişê keyeyan ê qezaya Licê û Yenîşirê yê Amedî de 4 kesî destbend bîyî. Dewa Hêzanî ya ke serê qezaya Licê de ya Welat Yalçin û Mûstafa û Yahfûr Çelîk yê birayê yewbînanê ameyî destbendkerdiş. Ame zanayîş ke beno ke hûmara destbendkerdişan zêde biba. 

 

Sereştişê keyeyê qezaya merkezî ya Yenîşehirî de zî endamê Meclisê Şaredarîya Yenîşehirî yê HDPyî yê verê Fûat Yalçin, ame destbendkerdiş. 

 

Ame dîyarkerdiş ke welatijî bi îdiayê “hetkarîya rêxistine” yenê sûcdarkerdiş û dozgerî qerarê "nimitişî" dayo serê dosyaya înan.