Şehrîban Aslan

 

AMED - Hemsereka DGFyî û edîtora MAyî Dîcle Muftuogluye 5 aşmî yo tepişte ya û îdîanameyo ke 43 rîpelî ra pê yeno û derheqê aye de ameyo amadekerdiş zaf balkêşo ke ci ra tena di rîpel û nîme aîdê aye yo. 

 

Mîyan de Hemsereka Komeleya Rojnamegerê Dîcle Firatî (DFG) û edîtora Ajansê Mezopotamyaye (MA) Dîcle Muftuogluye zî tede 5 ci ra tepişte derheqê 49 kesî de hetê Serdozgerîya Komare ya Anqaraye ra tehqîqat dîya destpêkerdiş û îdîanameyo ke 18ê Temmuze de ame temamkerdiş 27ê Temmuze de hetê 28ine Mehkemaya Cezaya Girane ya Anqarayî ra teslîmê dozgerîye ame kerdiş. Mehkema da zanayîş ke îdîaname bi komî ameyo amadekerdiş û ganî îdîaname şexsî bêro amadekerdiş. 

 

Mehkema prosesê dimayî de îtîrazê dozgerîye zî red kerd. Dima dozgerîye 6ê êlule de derheqê Dîcle Muftuoglu û edîtorê MAyî Sedat Yilmazî ke pîya ameybî destbendkerdiş û tepiştiş de bi îdîayê ‘endamtîya rêxistine’, ‘awankerdişê rêxistine’ ra îdîaname amade kerd. Eynî mehkema no îdîanameyê dozgerîye zî qebul nêkerd û 21ê êlule de qerarê qelsî da. Mehkema nê qerarê xo de zî da zanayîş ke îdîa Amed de derbaz benê û coka ra zî qerar da ke do îdîaname bierşawê Mehkemaya Cezaya Girane ya Amedî. 

 

Îdîanameyê derheqê Dîcleye 6ê êlule de ame amadekerdiş û hetê 4ine Mehkemaya Cezaya Girane ya Amedî ra îdîaname ame qebulkerdiş û roniştiş zî do 7ê Kanûne de bêro dîyîş. 

 

Nasnameyê rojnamegerîye ame vîrîkerdiş 

 

Îdîanameyê 43 rîpelî ke derheqê Dîcleye de ame amadekerdiş de tena di rîpel û nîme aîdê Dîcleye yê û yê bînî zî derheqê îfadeyê şahidanê nimite yê derheqê PKK û KCDyî de yê. Îdîaname de falîyetê rojnamegerîye, pêvînayîşê telefonî yê bi meslektaşarê xo reyde û çimeyê xeberan reyde kerdî suc û endamtîya rêxistine ameye mojnayîş. Îdîaname de nasnameyê rojnamegerîye yê Dîcleye zî ame vîrîkerdiş. 

 

Malumatê şaş sey raşt ameyî pawitiş 

 

Îdîaname de yew babeta bîn a balkêşî zî zîyaretê teberê welatî yê Dîcleye bî. Vejîyayîşê teberê welatî zî sey îdîayê ‘îrtîbat û têkilîya bi rêxistine reyde’ ame dîyîş û ca dayî nameyê kesê ke derheqê aye de kerdoxî kerdî. Sewbîna zî îdîaname de ca dîya raporê analîzê ekonomîye yo ke hetê MASAKî ra ameyo amadekerdiş û dayîş û herînayîşê pereyî yê Dîcleye bi îdîayê ‘endamtîya rêxistine’ sey suc ameyî dîyîş.