Zelal Tunç

 

WAN - Hemverfeka OHDyî Mehtap Işike tecrîdo giran ê serê Rayberê PKKyî Abdullah Ocalanî ercnaye û vat ke seba muracatê îna yê pêvînayîşî tu cewabêk nîno dayîş û do hewldayîşê xo dewam bikerê. Mehtabe vat ke ganî DMME Tirkîya hîna zêde bida zorî. 

 

Tecrîdê giran ê serê Rayberê PKKyî Abdullah Ocalanî dewam keno û girêdayeyê tecrîdî problemê krîzê ekonomîye, hêrişê serê cinîyan, binpaykerdişê heqan yê zîndanan û serê komelî her ke şino zêde beno. 

 

Hemverfeka Komeleya Huqûqnasê Seba Azadîye (OHD) ya Wanî Mehtap Işike tecrîdî ercna.

 

‘Ma tu xebere nêgînê’ 

 

Mehtabe da zanayîş ke hetê huqûqî de ganî tepişteyêk ke cezaya muebeto giran girewto bi keye û avûkatan redye pêvînayîş bikero û vat: “No heqêq huqûqî yo. Pêvînayîş seba tepişteyêk heqêk esasî yo. Ma nê heqî wazenê. La cewabê tu muracaatanê ma nîno dayîş. Coka ra ma bi fikarin ê. Ma derheqê rewşa Birêz Ocalanî de tu xeberêke nêgînê. Ma şert û mercê weşîya ci û waştişê ci nêzanê.” 

 

Qawişê yew kesî yeno awankerdiş 

 

Mehtabe ard ziwan ke tecrîdo giran tesîrê xo heme zîndanan ser de zî kerdo û wina vat: “Tecrîdê Îmraliyî sînoran derbaz kerdo û serê heme zîndanan de kerdo. Huqûq bi temamê raşte ra ameyo wedaritiş. Tedaya gird babeta vatişî ya. Ewro şertê tecrîdî de qawişê yew kesî yenê viraştiş. Bi taybetî zîndanê Tîpê Y û Syî de her kes qawişê yew kesî de yeno tepiştiş. Taybetî tepişteyê ke muebet û muebeto giran girewtî. Her kes qawişanê yew kesîyan de yeno tepiştiş. Zîndanê Dumlu yê Erzirom û zîndanê Asayîşo Berz de Tîpê S û Yyî çin ê la qawişê yew kesîye uca de zî estê. Tecrîdê Îmraliyî tesîrê xo serê heme komel û tepişteyan de kerdo. Cuya tepişteyan yena tehdîtkerdiş û binpaykerdişê heqan zêde bîyo.” 

 

Cewabê muracatan nîno dayîş 

 

Mehtabe dîyar kerd ke sey OHD û Baroyî tarîxê Hezîrana 2022 û teşrîna verêne ya 2022yî de seba pêvînayîşê bi Abdullah Ocalanî reyde waştiş kerdî la tu cewabêk ne pozîtîf û ne zî negatîf nêameyo dayîş û wina ercnayîş kerd: “Sîstemê Îmraliyî sîstemêk balkêş o. tu waştiş nîno cewabkerdiş. Huqûq bi tu hawayî pê nîno. Mehkemaya Heqanê Merdiman a Ewropa seba Ocalanî qerarê ‘heqê hêvîye’ da. Goreyê nê qerarî kesêk temamê cuya xo de nêeşkeno tepişte bimano. La vera nê qerarî Tirkîya goreyê qanûnan tênêgêrena. Tecrîd heme hetan ser de tesîr viraşto. Ekonomîye ra bigêr heta şîdetê serê cinîyan heta tedaya serê zîndanan û komelî. Ganî DMME hetê pêvînayîşan de Tirkîya bida zorî.” 

 

‘Do muracat dewam bikerê’ 

 

Mehtabe eşkera kerd ke muracat dewam kenê û wina vat: “Welat caardişê tecrîdê giran nêkeno rojeva xo. Zîndanê Îmraliyî nêkeno rojeva xo. Seke cayêk winasî, giravêk winasî çinî bo têgêrenê. La tecrîdêk giran esto. Bêhuqûqîyêk gird esto. Qerarê DMMEyî pê nîno. Ma do sey OHDyî seba caardişê tecrîdî raşte ra bêrê wedaritiş muracatê xo dewam bikerê.”