STENBOL- Cezayêke bîne ya "dîsiplînî" Rayberê PKKyî Abdullah Ocalanî rê ameye birnayîş ke na ceza pêvînayîşê bi keyeyî reyde asteng kena. Waştişê avûkatan ê semedê nimûneyê dosyaye, hetê hakîmî ra bi sebebê "do çapemenîye de vila bibo" ame redkerdiş.

 

Avûkatanê Buroyê Huqûqî yê Asrinî seba ke muwekîlanê xo Rayberê PKKyî Abdullah Ocalan, Hamîlî Yildirim, Veysî Aktaş û Omer Hayrî Konarî de pêvînayîş bikerê, 10ê teşrîna verêne de muracatê Hakîmîya Înfazî ya Bursa kerdbi. 

Avûkatan muracat de waşt ke wa muwekîlanê xo bivînê, eke cezaya dîsîplînî ya newîye est ba wa dosyaya ci bêra dayîş înan û eke “cezayêke” newîye dîyaya wa bêra betalkerdiş. 

 

Hakîmîya Înfazî 13ê teşrîna verêne de cewab da muracatî û pare kerd ke Rayberê PKKyî û tepişteyanê Îmraliyî yê bînan rê ancî 'cezaya dîsîplînî' dîyaya. La nêzanîyeno ke na ceza key, çira û senî ameya dayîş. 

 

Hakîmîya waştişê teslîmê dosyayanê ceza bi bahaneya 'çapemenîye de weşanîyenê' red kerd.