Rozerîn Gultekîn

 

STENBOL - Besna Tosuna ke hema tute bîye, pîyê aye Fehmî Tosun nezaret de ameybî vînîkerdiş, Raşteyê Galatasarayî de seba dîyîşê pîyê xo têkoşîn nas kerd. Besnaye çalakîya hewteyê 968î de bi 6 kelemçeyan ameye destbendkerdiş û îşkencekerdiş. Besnaye muracatê sucî kerd û vat: “Ma raşte ra wetêr heskerdoxanê xo wazenê. Ez venga paştîdayîşî kena.” 

 

Dadîyê Şemeyî 27ê Gulana 1995î ra heta nika seba persayîşê aqûbetê merdimanê xo yê ke wextê destbendkerdişî de ameyî vînîkerdiş 28 serrî yo bêmaben têkoşîn danê. Dadîyê Şemeyî 700 hewte yo her şewe saet 12.00î de Raşteyê Galatasarayî de yenê têkişt û waştişanê xo anî ziwan ser. Hewteyê 700yî de bi hawayêkê bêhuqûqî hêrişê çalakîye ame kerdiş û dima ra qedexeyan vera dadîyî têkoşînê xo raşteyê cîyayan de pê ardî. Dadîya Şemeyî Masîde Ocak Kişlakçi û Sereka Komeleya Heqanê Merdiman (ÎHD) ya Stenbolî Gulseren Yolerîye muracatê Mehkemaya Destûrê Bingeyîn (DDB) kerdî û netîceyê qeraro ke ame dayîş de ame vatiş ke Heqê Caardişê Rayîr ra Şîyayîş û Kombîyayîşî ameyo binpaykerdiş û ganî tazmînat bêro dayîş. Nê qerarî ra dima raşte reyna dadîyan rê ame akerdiş. 

 

La 8ê Nîsane ra yo polîsî her hewte bi bahaneyê qedexeyê qeymeqamtîya Beyogluyî dadîyan destbend kenê û vera nê caardişan dadîyî reyna têkoşînê xo dewam kenê. Înan ra yew zî kênaya Fehmî Tosunî ke 19ê teşrîna verêne ya 1995î de wextê destbendkerdişî de ame vînîkerdiş, Besna Tosune ya. Besnaye emrêk şenik de şina raşteyê Galatasarayî. Hewteyê 968î de hetê polîsan ra raştê şîdetî ameye û pê 6 kelemçeyan ameye destbendkerdiş. La Besnaye vera heme tedayan de têkoşînê xo de qerardar a. 

‘Dewlete na Besnaye awan kerde!’ 

 

Besnaye dîyar kerd ke dewa Leco ya Licê ya Amedî de bi tedaya dewlete reyde rî bi rî menda, pîyê aye Fehmî Tosunî semedo ke qorîcîtî qebul nêkerdo, ameyo vînîkerdiş. Besnaye wina vat: “Kesê ke qorîcîtî qebul nêkerdî îşkence û şîdet dîyî. Pîyê mi ame destbendkerdiş. Dewa ma qorîcîtî qebul nêkerdêne. Her roje eştêne serê dewa ma û kesan tepişnayîne. Heme keyeyê dewa ma veşênayî. Serranê 90î ra heta nika tu çîyêk nêbedelîyayo. Çîyê ke no hewte ameyî sereyê sey ê serranê verênan bî. Dewlete xerîb nîya. Pratîkê înan nêbedelîyayo. La pratîkê têkoşînê ma zî esto. Têkoşînê ma 90î ra nata dewam keno. Dewlete na Besnaye awan kerd.” 

 

Sere netewênayî, bedel dayî…

 

 

Besnaye ard ziwan ke dewlete bi serran o hewl dana şaran çinî bikera, bi şaran sere bida çewtkerdiş û wina dewam kerd: “Semedo ke ma îtîraz kerd ma bedel danê. Vera hende şîdetî de ma reyna zî çalakîya xo dewam kenê. Tehemulê înan aştîye ra çin o. Dewlete vana ez do her çîyî bikera la îtîraz mekerê. La ma nê çîyî qebul nêkenê. Dadîyê Şeme wijdan û vîrê nê welatî yê. Tena seba tutanê xo raşteyan de nîyê. Seba ameyoxê ma heme kesan têkoşîn danê." 

 

‘6 kelemçe nîşaneyê kîn û nefretê înan o’ 

 

Besnaye qiseykerdişê xo de bale ant serê 6 kelemçeyê ke girê dîyayî destê aye û wina vat: “No hêriş tena şexsê mi de nîyo. Hêrsê înan vera çalakîya 28 serrî de yo. 6 kelemçe vistî destê mi. 6 kelemçe nîşaneyê kîn û nefretê înan ê vera dadîyê şemeyî yo. Eynî hewte de yew embaza mi ya nêweşa kanserî zî estbî ke polîsan aye kuyabî estbî. Her çend ke ma vat nêweşa kanserî ya zî kuyayî. Her hewte bi hawayêkê bêhuqûqî ma destbend kenê. Ma vanê ke no bêhuqûqî yo. Ma qerarê Mehkemaya Destûrê Bingeyîn yê ‘binpaykerdişî’ rê vanê û vera destbendkerdişan de xover danê.” 

 

 

Waştişê înan aqûbetê merdimanê înan o 

 

Besnaye qiseykerdişê xo yê peyênan de dîyar kerd ke ê her hewte îfadeyê xo de şîdet û binpaykerdişê heqan dîyar kenê û mjuracat kenê. Besnaye wina peynî ard: “No hewte zî ez, endama komîsyonê zîndanan a ÎHDyî Hatîce Onaran û waya xo Newroz Tosune ma şîyî Edlîyeya Stenbolî ya Çaglayanî û ma gerre kerd. Ez venga her kesî kena ke paştîdayîş bidê Dadîyê Şemeyî. Waştişê ma dîyîşê merdimanê ma yo. 28 serrî yo ma têkoşîn danê. Yewine waştişê ma aqûbetê merdimanê ma yo. Heta ke ma heskerdoxanê xo nêvînê ma do têkoşînê xo ra fek vera nêdê.”