STENBOL - Dadîyê Şemeyî pêwa astengîyê polîsan zî, hewtetê 970î de zî ver bi Galatasarayî de rayîr ra şîyî. Polîsan reyna xeylêk kesî destbend kerdî. 

 

Dadîyê Şemeyî bi 28 serrî yo semedê aqubetê merdimanê xo bipawê, Raşteyê Galatasarayî de çalakîye organîze kenê. Dadîyê Şemeyî pêwa astengîyê polîsan zî hewteyê 970î yê çalakîya 28 serran de ver bi Galatasarayî de rayîr ra şîyî. Parlamentera HEDEPyî ya Stenbolî Kezban Konûkçû û îdarekarê HEDEPyî û xeylêk kesan paştdayîş da Dadîyanê Şemeyî. Pêwa qerarê "binpaykerdişî" yê Dadgeha Makeqanûnî zî dekewtişê Dadîyê Şemeyî yê Raşteyê Galatasarayî hetê qeymeqemtîyê Beyogluyî ra ame astengkerdiş. Polîsê ke destûr nêdayî çalakîye, pêro kuçe û cadeyê derûdorê raşteyî ablûqa kerdî û bi barîyeran padayî. 

  

Polîsan, Dadîyê Şemeyî ablûqa kerdî û nêverdayî şêrê raşte. Polîsan ablûqa de dadîyan û pawitoxê heqê merdiman derb kerdî. Rojnamegerê ke waştî dîmen û fotografan bigîrê zî derûdor ra ameyî dûrkerdiş. 

 

Dadîyê Şemeyî-Merdimê Şemîye mîyanê ablûqayê polîsan de çepkî ameyî kelemçekerdiş û destbendkerdiş. Polîsan waştî ke parlamentere Kezban Konûkçû derûdor ra dûr bifînê. Parlamentere Kezban Konûkçû reaksîyon nîşanî astengî û helwesta polîsan da û vat: “Ez tîya îşkence, destbendkerdiş rê çimdarî kena la bi darê zorê mi dûr fînenê. Pêwa ke ez parlamenter a û nêeşkenê dest bidê mi zî la reyna hewl dayî mi dûr bikerê.” 

 

20 kesî ra zêdeyêr Dadî û Merdimê Şemeyî ameyî destbendkerdiş û wesayîtê destbendkerdişî rê espar kerdî. Destbendkerdeyan zerreyê otubusr de engiştanê xo yê serkewtişî mojnayî.