Oznûr Deger

 

MÊRDÎN - Mamosteya mexmurije Marîa Bozane hêrişê Tirkîya yê vera Mexmurî ercnaye û vat: “Bombeyê ke yenê eştiş de madeyê ke merdiman ser de tesîrê negatîf virazenê, estê. Wexto ke bombe yeno eştiş merdim nêeşkeno nefes bigêro. Zerrîya merdimî qelibîyena û merdim erzeno teber. Kuxik merdiman de virazîyeno. Parçeyê bombeyan vilayê kîlometreyan benê. Wazenê tesîrêk daîmî biverdê û merdiman jehrî bikerê. La her hêrişo ke yeno kerdiş ma hîna zêde hêrs keno.” 

 

Tirkîya dimayê hêrişê 4ê teşrîna verêne ke hemverê Bakur û Rojhelatê Sûrîye da destpêkerdiş hemverê Mexmûrî yê Herêma Federal a Kurdistanî de zî dest bi hêrişan kerd. 7ê teşrîna verêne de hêrişan de cinîyêk û tutêk birîndar bîbî. Hêrişanê 13ê teşrîna verêne de zî cinîyêk birîndar bîbê. 

 

Mamoste Marîa Bozane ya ke Mexmur de ciwîyena qala qewimîyayîşê herême kerd. Marîaye da zanayîş ke Mexmûr parçeyêk Kurdistanî yo û no 30 serrî yo Mexmûr de xoverdayîşêk gird yeno dayîş û şarê Mexmûrî şarêk rêxistinkerde yo. Marîaye bale ant serê zor û zehmetîyê koçberan û wina vat: “Şarê Mexmûrî lazimîyê cuye bi xo temîn keno. Kulturêk rêxistinî yê şarê Mexmûrî esto. Her hetî ra eşkenê xo rêxistin bikerê û lazimîyanê xo temîn bikerê. No 30 serrî yo serê şarê Mexmûrî ser de polîtîkayê parçekerdişî yeno rayîr ra berdiş. La nêeşkenê ser bikewê. Coka ra zî timî hêriş kenê.”

 

‘Vera bawerîye de hurmetê înan çin o’ 

 

Marîaye dewamê qiseykerdişê xo de bale ant serê hêrişê 7ê teşrîna verêne û vat: “Hemverê Mexmûrî de hêrişê hovane pê yenê. Her çend ke şar vera nê hêrişan de xerîb nêbo zî tesîrêk gird serê komelî de keno. Mexmur raşteyêk komelkî yo. Cinî, tutî, ciwan, kal û pîrî pîya ciwîyenê. Raşteyê cuye yeno hedefgirewtiş. Merkezê bawerîye yeno hedefgirewtiş. Hemverê bawerîyan de zî rêzê înan çin o. Îslam sey halet yeno şixulnayîş. Îqtîdar bawerîya îslamî şuxilneno û têkoşînê kurdî hedef gêno. Amancê înan zî no yo. Hêrişê ke yenê kerdiş suc ê. No sucê merdimîye yo.”

 

‘Bombayan de tesîrê negatîfî serê merdiman de verdenê estê’

 

Marîa nê çî vat: “Tesîrê hêrişan hîra yo. Merdim ne tenê fîzîkî hetê psîkolojîkî de zî tesîr beno. Hemverê hêrişan de Mexmur de 7 ra heta 70 her kes vejîyayî kuçeyan. Kes keyeyê xo de nêmend. No wehşetê  hêrişan mojneno. Bombayê ke yenê şuxilinayîş de gazê ke yenê eştiş de maddeyê ke tesîrê negatîf serê bedenê merdimî de kenê estê. Wextê bombavaranî de merdim nêeşkeno boye bigîro. Zerrîya merdimî qelibêna. Kuxike vejêna werte. Parçeyê bombayan vilayê kîlometreyan benê. Amancê înan kiştiş nîyo. Wazenê tesîrêk verdê û merdiman jehrî bikerê.

 

‘Bi şermezarkerdişî hêrişî nêvindenê’ 

 

Marîa peynîya qiseykerdişê xo de dîyar kerd ke bi şermezarkerdişî hêrişî peynî nêbenê û vat: “Ewro Rojawan de sivîlî yenê qetikerdiş. La her kes bêveng o. Tenê şermezar kenê. La bi şermezarkerdişî hêrişî nêvindenê. Ganî wayîrê Rojawanî bêro vejîyayîş. Ganî semedê kurdan paştdayîş bêro dayîş.”