AMED - Endama SESî Fatma Yildizhane bale ant serê rewşa tepişteyê nêweş û da zanayîş ke qanûnê aliqnayîşî verişt la tepişteyê nêweş zîndanan de terkê mergî yenê kerdiş. Fatmaye da zanayîş ke ganî her kes û her dezgeh seba zîndanan cehd bikero û reaksîyon bimojno. 

 

Rewşa tepişteyê nêweş her ke şina giran bena û serê tepişteyê siyasî yê nêweş de tecrîd her ke şino giran beno. Tecrîd tesîrêk gird serê tepişteyanê nêweşan de keno, dermankerdişê tepişteyan yeno astengkerdiş û bi raporê ATKyî yê eşkenê tepişte bimanê zî tepişte terkê mergî yenê kerdiş. Endama Sendîkaya Kedkarkê Xizmetê Weşî û Komelî (SES) Fatma Yildizhane derheqê babaete de ercnayîş kerd.  

 

Heqê weşîye yeno astengkerdiş 

 

Fatma da zanayîş ke tepişteyê nêweşî nêeşkenê xo biresnê heqê weşîye û no tena zîndanan de nê heme raşteyan de yeno ciwîyayîş. Fatma wina dewam kerd: “No polîtîkayê şerê taybet yê îqtîdarî yo. Dormeyê zîndanan xeylê xirab o. Îqtîdar tepişteyê nêweşan serbest nêverdeno û heqê înan binpay keno. Bêhuqûqîyo ke yeno ciwîyayîş ne merdimîye û ne zî huqûqê mîyanneteweyî de cayê ci esto.”

 

‘Dermankerdişê bi kelepçe raybazê cezakerdişî yo’

 

Fatma bale ant serê prosesê dermankerdişê tepişteyan û babeta dermankerdişê bi kelemçe zî ercnaye û wina vat: “Wextê dermankerdişî de mahremîyetê nêweş û doktor yeno binpaykerdiş. Na rewşe nîna qebulkerdiş. Bi taybetî wexto ke tepişteyê sîyasî benê nêweşxane bi kelemçe benê û no raybazêk cezakerdişî yo. No seba şikitişê ercê merdimîye yo. Tedaya sîstemî ra xebatkarê weşîye zî para xo gênê.”

 

‘Wezîfe keweno serê milê kedkarê weşîye’ 

 

Fatma dewamê qiseykerdişê xo de dîyar kerd ke vera binpaykerdişê heqan de wezîfeyêk gird keweno serê milê kedkarê weşîye û wina dewam kerd: “Hem babeta meslekî û hem zî babeta vindertişê merdimîye de ganî reaksîyonê xo vera înan de bimojnê. Wexto ke xebatkarê weşîye vindertişê xo mojnenê zî hêriş hemverê înan de pê yeno. Şertê zîndanan xeylê xirab ê. Tepişteyê nêweşî şertê giranan mîyan de menenê û heqê dermankerdişî çin o. Şertê zîndanan tesîrêk prosesê dermankerdişî ser de keno. Tepişteyê nêweşî terkê mergî yenê kerdiş.” 

 

Zîndanan de cezakerdişêk cîya 

 

Fatma qiseykerdişê xo yê peyênan de bale ant serê raporê dezgehê bînan yê seba tepişteyê nêweşî û vat: “Eke di dezgehê cîya yê girêdayeyê dewlete ra raporê cîya bivejê no mojneno ke cayêk de mudaxale esto. Wexto ke dezgehêk seba tepişte ‘nêeşkeno tepişte bimano’ rapor bido ganî no esas bêro girewtiş. Ganî sîstem de no kes bêro esasgirewtiş. Ez venga berpirsîyarê heme hetan kena. Ganî her kes û her dezgeh babeta tepişteyan de wezîfeyê xo ca bîyaro, reaksîyonê xo bimojno. Ganî mekanîzmayê vindertişê hempar bêro mojnayîş.”