Şehrîban Aslan

 

AMED - Mehkema cezaya muebeto giran ê Tarik Kaplanî ke cehd kerd Nurcan Kaplan û dadîya aye Nezîre Demîre bikişo, fîna 15 serrî. 

 

Taxa Şehîtlîkî ya qezaya Yenîşehîrî ya Amedî de Tarik Kaplan 1ê Hezîrana 2021î de pê çeke cehd kerd ke Nurcan Kaplana ke ci reyde mîyanê prosesê fekverdayîşî de bî û dadîya aye Nezîre Demîre bikişo. Nurcan û Nezîre netîceyê hêrişo ke sûke ra agêrayêne de bi giranî birîndar bîyî. Kerdox Tarik Kaplano ke cayê qewimîyayîş ra rema, Temmuza 2021î de ameybî tepiştiş û şirawîyabî zîndan. 

 

Nurcane ajansê ma rê qisey kerd û dîyar kerd ke 15 serrî yo bi hawayêkê sîstematîk vera aye de şîdet pê ardo û her çend ke bi serran xeylê reyan gerre bikera zî hemverê şîdetî de tu tedbîrêk semedê vernîgirewtiş û pawitişî nêameyo girewtiş. Nurcane wina dewam kerd: “Ma ganî ez bimira ke ti Tarik Kaplanî bitepişî? Bi serran ez raştê şîdetê sîstematîk ameya, qereqolêk ke mi tede gereyê Tarik Kaplanî nêkerd nêmend. Qerarê pawitişî yê ke ameyî dayîş zî nas nêkerd. La ez fikirîyena ke gereyê mi û vengê mi do dimayê mergê mi bêro eşnawitiş.” 

 

Nurcane da zanayîş ke faîl aşma Temmuza 2021î de ameyo destbendkerdiş û dewam kerd: “Dima ke ame destbendkerdişî, ame tepiştiş. Serdozgerîya Komare ya Amedî derheqê kerdox Tarik Kaplanî de bi ‘Hemverê cinîye de hewldayîşê kiştişî’ û ‘Netîceyê hêrişê çekin de birîndarkerdiş’ îdîaname hadre kerde. Îdîaname hetê 13ine Mehkemaya Cezaya Girane ya Amedî ra ame qebulkerdiş. 

 

Dewa 2 serre dewam kerd û 9ine roniştişê dewaye 15ê êlule de ame dîyîş. Heyetê Mehkema derheqê kerdox Tarik Kaplanî de qerarê muebeto giran da û dima ra zî bi bahaneyê ‘Cehdkerdişî’ yê hêrişê hemverê Nurcane cezaya ci fîna 15 serrî. Semedo ke Nezîre Demîre zî birîndar kerdbî 4 serrî û 6 aşmî ceza dîya Tarikî.