AMED - Bajarê Amedî hetê resnayîşo komkî de probleman ciwîyeno û şar çaresernêkerdişê problemê resnayîşo komkî ra bi reaksîyon o. 

 

Îqtîdar serra 2019î de qeyûm tayînê şaredarîyanê Kurdistanî kerd û problem her ke şino zêde beno. 19ê Tebaxa 2019 de qeyûm tayînê şaredarîya Amedî bî û bajaro ke 2 mîlyon nufusê ci esto de problemê resnayîşo komkî nîno çareserkerdiş. Hemwelatijî seba ke biresê kar, wendekarî seba ke biresê mekteban mecburî kewenê otobusanê qelebalixan. 

 

Hemwelatijî na rewşe rê reaksîyon mojnayî. Hariye Demîrele da zanayîş ke TOKÎyê Seyrantepeyî de di wesayît tena estê û wesayîtê F7 dimayê saet 19.00î nêxebetîyeno. Hayrîye dîyar kerd ke na dewlete kam ca de ya, wa bimojnê û şaredarîye vat ke do otobusan zêde bikerê. La her kes mexdur o.

 

 ‘Otobuse qey saetê xo de nîna’ 

 

 Leman Alana ke awanîyê TOKÎyî de ronişena da zanayîş ke resnayîşo komkî zaf bi problemin o û vat: “Otobusî saetê xo de nînê. Otobusê ke yenê zî pirkerde yê. Ca çin o merdim gama xo bierzo. Ma mexdur benê. Saetê înan yewbînan nêtepişeno. Bi raştî rewşa ma zehmet a."

 

 ‘Ganî problem bêro çareserkerdiş’ 

 

 Aysel Işike ard ziwan ke hemwelatijê Amedî bi saetan dingan de paweyê otobusan vindenê û wina vat: “Otobusî zaf erê yenê. Wexto ke yenê zî pirkerde yê. Ma nêeşkenê xo biresnê kar. Kal, pîr, cinî, tutî bi saetan dingan de pawenê. Ganî na rewşe bêra çareserkerdiş. Ganî hûmara otobusan bêra zêdekerdiş. Otobusê ke yenê zî erê yenê.” 

 

Evîn Azade zî eşkera kerd ke şaredarîya qeyûmî na babete de qels a û ganî şaaredarî hûmara otobusan zêde bikera û şar zî vera înan probleman de ganî vengê xo berz bikero, probleman bîyaro ziwan. 

 

Zozan Kizilkayaye zî nê çîyan vat: “Otobusî nînê. Otobusê ke yenê zî pir ê. Merdim nêeşkeno ca bigêro. Roja ke qeyûm ameyo tayînkerdiş ra nata ma na rewşe de yê. Ma rezîl bîyî.”