Rozerîn Gultekîn

 

AMED - Dadîya Leyla Gulcuya ke 4 aşmî yo nêeşkena cenazeya kênaya xo bigêra, Ayten Gulcuye da zanayîş ke aye embazêka zaf baş bî ke merdim nêeşkeno qala aye bikero û vat: “Madeyê kîmyewî şuxilnenê. Nêwazenê no bivejîyo raşte. Pêro dezgehê dinya bêveng ê. Qey?”

 

Endama YJA STARî Leyla Gulcu (Dîcle Eylem) Koyê Bagokî de 4ê Tebaxe de bombardumanêk de tewrê hîrê embazanê xo reyde dinyaya xo bedilnaye û goristanê bêkesan de ameye definkerdiş. Cenaze bi aşman o teslîmê keyeyî nîna kerdiş. Keye 17ê Tebaxe de muracatê serdozgerîya Komare ya Mêrdînî kerd û nimuneyê DNAye da. Vera hende aşmanê ke derbaz bîyî hema zî DNA bi netîce nêbîyo. Keye înan ra dima 12ê teşrîna verêne de şî Mêrdîn û waşt ke dozgerî reyde seba ke raporê ATKyî lezkî bibo muzakere pê bîyaro. Vera hende aşmê ke derbaz bîyî hema tu netîceyêk nêameyo girewtiş. Dadîya Leylaye, Ayten Gulcuye reaksîyon mojnaye û venga paştîdayîşî dezgeh û pawitoxanê heqî kerd. 

 

Muzekkere 4 roje ra tepîya ame nuştiş 

 

Aytene da zanayîş ke seba raporê lezkî bêro amadekerdiş muracatê dozgerîye kerdî û dozgerî nê çîyî qebul kerd û vat: “Vera nê qerarî averşîyayîşêk çin o. Seba lezbîyayîşî hema belgeyêk erşawenê la belge 4 roje ra tepîya 16ê aşme de şirawitî. Wazenê dejê ma zêde bikerê. Wa her kes wayîrê cenazeya xo bivejîyo. Êdî bes o. Ma do heta peynî cenazeya xo pey de bê. Îqtîdar vano ez misliman a. La çîyê ke keno îslamî nîyê. Semedo ke cenazeyê ma bi madeyê kîmyewî ameyî veşênayîş nêdanê. 4 aşmî yo ma danê vindertiş.”

 

 ‘Çîyê ke Îsraîl û Tirkîya kenê yew ê’ 

 

Aytene dîyar kerd ke seba cenazeya xo bigîrê muracatê dezgehê pawitoxê heqan kerdî la uca ra zî tu kes înan nêgêrayo û wina dewam kerd: “Ma muracat ÎHDyî zî kerd la înan ra zî çîyêk nêvejîya. Xeberêk nêdayî. Avûkatî cewab nêdanê telefonan. Ganî ÎHD ser de vindero. Ez dewlete lanet kena. Nê çîyê ke yenê kerdiş merdimîye nîyê. Ganî cenazeya ma bidê. Çîyo ke Îsraîl keno û Tirkîya zî kena. Madeyê kîmyewî şuxilnena. Nêwazena no bivejîyo raşte. Coka ra cenazeyan nêdanê. Heme dezgehê dinya bêvengû. Qey bêveng ê?”

 

 ‘Wa êdî peynî bibo’ 

 

Aytene qiseykerdişê xo yê peyênan de vat: “Kênaya mi merdimêk baş bî. Embazêke baş bî. Bi vatişan nîna vatiş. Ez venga her kesî kena ke wayîrê cenazeyan bivejê. Wa şar têkişt de bibo. Amancê ma girewtişê cenazeyan o. Wa êdî aştî bêra. Wa cenaze nêrê. Kesebaya ma xora veşêna wa yê dadîyanê bînan nêvêşa. Ma do rojê vernîya ma de reyna şêrê Mêrdîn.”