Elfazî Toral

 

STENBOL - Kampanyaya TJAyî ya bi sloganê “Bi jin jiyan azadîye ver bi azadîye ra" qezayê Stenbolî de bi xebatê atolyeyan dewam kenê. Aktîvîstê TJAye û sîyasetmedarî bale antî serê muhîmîya organîzekerdişê atolyeyan û vatî: "Ganî ma hîna zêde serê azadîya şarê kurdî û azadîya serekatîye de vinderê û têkoşîn bikerê." 

 

Têgêrayîşê Cinîyê Azade (TJA) bi sloganê “Bi jin jiyan azadîye ver bi azadîye ra" 15ê Êlule de Riha de kampanyaya xo deklere kerd. 20ê Êlule de zî Silopîya Şirnexî de zî startê xebatan da û dîyar kerd ke kampanya do heta 8ê Adare dewam bikera. Yew amancê kampanyaye azadîya fîzîkî ya Abdullah Ocalanî yo û yewna zî têkoşînê vera polîtîkayê şerê taybet ê îqdarî yo. Bi kampanyaye cinîyan do rêxistinbîyayîşê xo gird bikerê û hîna zêde xo biresnê cinîyan. 

 

Çarçeweya kampanyaye de Kurdistan û Tirkîya de atolye ameyî organîzekerdiş. Stenbol de 4 û 5ê Teşrîna Peyêne de Umranîye, Bagcilar û Esenlerî de atolye ameyî organîzekerdiş. Atolyeyan de babetê sey tecrîd, polîtîkayê şerê taybet, zanayîşê cînsîyetî, şîdetê camêrd û dewlete yê hemverê cinîyan ameyî munaqaşakerdiş. Hem atolyeyê xoser ê cinîyan û hem zî atolyeyê ke camêrdî zî tewrê ci benê ameyî organîzekerdiş. 

 

Derheqê atolyeyan de aktîvîsta TJAye Xecî Başkalane û Hemsereka Partîya Têdûşte û Demokrasîyî yê Şaran (HEDEP) a qezaya Zeytînburnu ya Stenbolî Zeynep Bîlgîne ajansê ma JINNEWSî rê qisey kerd.

 

'33 aşmî yo xeberêke nîna girewtiş' 

 

Xecîye da zanayîş ke çarçeweya xebatan de taxe û keyeyan de xebatî dayî destpêkerdiş û wina vat: “Bi taybetî ma xitabê cinîyan kenê. Ma kombîyayîş û atolye pê ard. No çî seba moral û motîvasyonî xeylê muhîm o.” Xecîye dîyar kerd ke 25 serrî yo Rayberê PKKyî Abdullah Ocalan binê tecrîdî de yo û 33 aşmî yo zî tu xeberêke ci ra nîna girewtiş û vat: "Hemverê serekî de tecrîdêk est o. Sewbîna şarê kurdî û cinîyê kurdî zî tecrîdî reyde yenê rî bi rî. Polîtîkayê tecrîdî hemverê dadîyê kurd û ciwanê kurd de her roja ke derbaz bena hîna xorî bena."

 

Rayîr ra berdişê polîtîkayê dişmenîye 

 

Xecîye qiseykerdişê xo de wina bale ant serê polîtîkayê dişmenîya hemverê cinîyan û vat: “Ma seba ke cinî hîna xurt biba, xebate rayîr ra benê. Cinî her hetî ra wayîrê rihê têkoşînkerdişî yê. Seba ma rojeva yewine tecrîdê hemverê serekatî yo. Ma do senî serekatîyê xo rizgar bikerê? Eke serekê ma azad nêbo do şarê kurdî zî azad bibo û sewbîna do heme şarê ke na herre ser de ciwîyenê azad bibê.” 

 

'Hemverê şarî de zî tecrîd est o' 

 

Zeynep Bîlgîne zî qiseykerdişê xo de bale ant serê tecrîdê hemverê Rayberê PKKyî Abdullah Ocalanî û wina ercnayîş kerd: “Rojeva şarê kurdî û cinîyan tecrîdê Îmraliyî yo. Tecrît hemverê şarî de yeno kerdiş. Ma erey mendî ke na rojeve hîna zêde biercnê. Tecrîd tena şexsê kesêk de nîno rayîr ra berdiş. Rayberê şarê kurdî ame tepiştiş û binê tecrîdî de yo. Partîyê sîyasî hemverê tecrîdî de têkoşîn danê la ganî herkes hemverê tecrîdî de reaksîyon bimojno." 

 

Seba bedilnayîş û açarnayîşî atolye 

 

Zeynepe qiseykerdişê xo de qala organîzasyonê atolye û babetê ke ameyî ercnayîş kerd û wina dewam kerd: “Atolye seba ercnayîşê çareserîya probleman o. seba bedilnayîş û açarnayîşî yo. Ganî atolyeyê winasî her tim bêrê organîzekerdiş. Bingehê nê têkoşînî hîra yo û sey behr o. Tecrubeyê nê zî sey behrî yo. Tena hetê sîyasî de nê ganî bi babetê cîyayî zî atolye bêrê akerdiş. Derheqê ziwanê dadîye de zî ganî atolye bêrê akerdiş. Darvistişê atolyeyan hema seba cinîyan û hem zî seba camêrdan muhîm o." 

 

'Ma kam ca de yê û se kenê?’ 

 

Zeynepe dîyar kerd ke zanayîşê polîtîkayê şerê taybet ê hemverê şarê kurdî muhîm o û wina qisey kerd: "Heme polîtîkayê sîstemî girêdayeyê yewbînan ê. Eke ma tesîrê polîtîkayê şerê taybetî baş bîgîrê dest, ma do bieşkê hemverê nê de zî têkoşîn bikerê. No polîtîkayê şerî tesîr serê ziwan û vindertişê ma de keno. Ma kam ca de yê û se kenê? Çîyo ke ma do atolyeyan ra bigîrê û tesîr dorme ser de bikerê est ê.” 

 

Muhîmîya organîzekerdişê atolyeyan 

 

Zeynepe da zanayîş ke ganî xebatê atolyeyan hem taxan de û hem zî qezayan de bêrê organîzekerdiş û wina qiseykerdişê xo peynî kerd: “Lazimîya ma atolye û perwerdeyan est a. Seba rêxistinbîyayîş û têkoşînî muhîm o. ganî ma agêrê serê raştîya xo. Ganî ma seba azadîya şarê kurdî û azadîya serek hîna zêde bifikirê. Seba şarê ke Tirkîya de ciwîyenê no çî xeylê muhîm o. Ma na cografyaye ser de ciwîyenê û sey şarê bînan zî ma seba azadîya xo têkoşîn kenê. Ma têkoşînê azadîya heme cinîyan gênê dest. Seba ke ma bibê serkêşê têkoşînê azadîya cinîyan û şorişgerîye rê têkoşîn lazim keno.”