Elfazî Toral

 

STENBOL - Endama Platformê Cinîyan a 25ê Teşrîna Peyêne Nazli Andane da zanayîş ke emser 25ê Teşrîna Peyêne de do raşteyê Mecidiyekoyî de bibê û wina vat: “Atmosferêke ke şer, feqîrî û şîdetê camêrdî bibo de ma do emser 25ê Teşrîna Peyêne de reyna rêxistin bikerê û vera şîdetî de raşteyan de bê. Ma venga heme cinîyan kenê ke raşteyan de bê. Çalakîya ma do saet 16.00î de pê bêra.” 

 

Cinîyî emser 25ê Teşrîna Peyêne Roja Têkoşînê Vera Şîdetê Serê Cinîyan de têkoşînê xo yê bi israr dewam kenê û Kurdistan ra heta Tirkîya do cinî her raşteyan pir bikerê. Rêxistin û dezgehê cinîyan yê Stenbolî bi venga Platformê Cinîyan ê 25ê Teşrîna Peyêne do Raşteyê Mecidiyekoyî de saet 16.00î de bêrê têhet. Endama Platformê Cinîyan a 25ê Teşrîna Peyêne Nazli Andane dîyar kerd ke vera heme teda û astengîyê îqtîdarî de do emser zî çalakîye pê bîyarê û JINNEWSî rê qisey kerd. 

Rojeva platformî şîdetê camêrd-dewlete ya 

 

Nazliye da zanayîş ke sey platformî her serre venga dezgehanê cinîyan kenê û emser zî do reyna bi cinîyan reyde bêrê têkişt û vat: “25ê Teşrîna Peyêne ra ver ma bi cinîyan reyde ameyî têkişt û serra peyêne de çi ameyî ciwîyayîş, çi nêameyî ciwîyayîş, ser de ma munaqaşa kerd. Ma bernameyê xo pîya dîyar kerd. Aşma peyêne de 247 cinî ameyî qetilkerdiş. Hetê keyeyî ra pîroz yenê dîyîş, heto bîn ra reyna hetê keyeyê xo ra yenê qetilkerdiş. Ma sey platform kerd rojeva xo. Şîdet zêde bîyo û çi heyfo ke polîtîkayê bêcezaverdayîşî zî cuye ser de tesîr keno.” 

 

Seba kiştoxan xelat seba cinîyan ceza!

 

Nazliye dîyar kerd ke cinîyî 25ê Teşrîna Peyêne de bivejê raşteyan yenê cezakerdiş û wina dewam kerd: “Vernîya qetilkerdişê cinîyan yena akerdiş. Kiştoxê cinîyan serbest yenê verdayîş. Kiştox bi destê hukmî yenê xelatkerdiş. Vera qerarê dûrîfînayîşî cinî yenê qetilkerdiş. Şîdet û qetilkerdiş keye ra yeno. Ma ewnîyenê keye de pîroz yenê dîyîş. Qanûnê ke cuya cinîyan teng kenê kewenê rojeve. Çalakîya 25ê Teşrîna Peyêne ya 2022yî de cinî bi îşkenceyî ameyî destbendkerdiş. Vera heme tedayan de cinîyan tepîya gamêke nêeşt. Derheqê polîsan de muracatê sucî kerdî. Şîdetê polîsan teşhîr kerdî û ameyî muhakemekerdiş. Seba cinîyêke zî cezaya zîndanî ameye dayîş.”

 

‘Polîtîkaya şer’ 

 

Nazliye bale ant serê şîdetê dewlet-camêrdî ke serê zîndanan de zî tesîr kerdo û vat: “Zîndanan de polîtîkayê tecrîdî est o, cinî şertê baş ê weşîye de nêmanenê. Xeylê heqê xo ra bêpar yenê verdayîş. Ma ewnîyenê kincê Gultan Kişanake zî nêgînê zerre. Xeylê îşkence bi cinîyan yeno kerdiş. Binpaykerdişê heqan est o. Polîtîkayê şerî mîyanê rojeva ma de yo.” 

 

Seba cuyêka bê şîdet… 

 

Nazliye qiseykerdişê xo yê peyênan de ard ziwan ke cinî polîtîkayê îqtîdarê AKP-MHPyî vera her raşteyî de yenê feqîrkerdiş û keda înan yena binpaykerdiş û wina peynî kerd: “Goreyê serra verêne şîdetê vera cinîyan zêde bîyo. Polîtîkayê bêcezavedayîşî, şîdet û şerê taybet, cinîyê koçber rojeva me de yê. Ma ver bi 25ê Teşrîna Peyêne ra şinê û xeylê vatişê ke ganî bêrê vatiş est ê. Atmosferêk ke şer, feqîrî û şîdetê camêrdî est o de ma do emser 25ê Teşrîna Peyêne de reyna rêxistin bikerê û vera şîdetî de raşteyan de bê. Ma venga heme cinîyan kenê ke raşteyan pirr bikerê. Çalakîya ma do 16.00î de pê bêra.”