Oznur Deger

 

MÊRDÎN - Dadîya Aştîye Selma Ozturke dimayê 48 serrî dest bi xeyalê xo yê tutîye xêzkerdişê resîman kerd. Selmaye dîyar kena ke ganî cinî pey xeyalê xo ra şêra û vat: “Merdim bi xeyal û hêvîyan ciwîyeno. Cuye xoverdayîş a. Ganî merdim pey xeyalê xo ra şêro. Ganî merdim goreyê kesan nêciwîyo.”

 

Ver bi 25ê Teşrîna Peyêne Roja Têkoşînê Vera Şîdetê Serê Cinîyan ra cinî bi felsefeya ‘Jin jiyan azadî’ tarîx newe ra nusenê. Nê rojan de vera şîdetî de têkoşînêk gird est o, cinî benê hêvî. 

 

Dadîya Aştîye Selma Ozturka ke qezaya Qoserî ya Mêrdînî de ciwîyena 12 serrî yo ke têkoşîn kena û no hîrê serrî yo ke zî bi xêzanê xo paştîdayîş dana têkoşînê cinîyan. Selma serra 1974î de Îzmîr de sey 10 tutanê keyeyî ra yew yena dinya û 4 serrî ya aye de keye yeno dewa xo ya Qurunî ya Qoserî. Ciwanî û tutîya aye dewe de derbaz bena. Selma dîyar kena ke tutîya xo nêciwîyaya û wina vat: “Xeyalê min zaf bî. Mi bi embazanê xo reyde wext derbaz nêkerd. Di xeyalê mi est bî. Yew resîm û ê bîn zî saz bî. Her çend ke keyeyê mi welatparêz bibo zî keyeyêk feodal bî. Mi zî nesîbê xo ci ra girewt. Mi tutîya xo ra tedaya vera cinîyan qebul nêkerdêne. Coka ra ma zaf reyan ameyêne rê bi rî. Mi babeta dînî de şaşî û nakokîyan dîyêne û mi vatêne.” 

 

Mi qerar da ke xo zêde aver bera 

 

Selma wina dewam kerd: “Pîyê mi kesêk feodal bî. Mi emrêk şenik de berpirsîyarîya way û birayanê xo girewt. Pîyê mi memur bî. Teber ra sey kesêk roşnvîr ameyêne dîyîş. La vera tutanê kênayan de zaf feodal bî. Mi wendiş ra zaf hes kerdêne. Destur nêdayêne ke ma teber de kay bikerê. Dewe de mektebê şewe dest pêkerdbî. Şewêk bi zorî şîya. Mi pîyê xo îqna kerd. Dima ra nêverda. La mi qerar da ke ez xo hîna zêde aver biba. 16 serrî ya mi de qerarê zewacî dayî. Mi vera nê qerarî de xover da. Ez bi lajê datê xo reyde ameya zewecnayîş. 5 tutê mi virazîyayî. Mi seba tutanê xo têkoşînêk gird da. Mi va çîyê ke ez nêciwîyaya wa ê biciwî. Nika tutê mi doktor ê. Kurdkî qisey kenê. Ez bi înan sere berz a.” 

 

Têkoşînê aye bi hewnêk dest pêkerd 

 

Selma dîyar kerd ke têkoşînê aye bi hewnêk dest pêkerdo û vat: “Mi embazêk hewnê xo de dî. Hetkarîya ma kerdêne. Perwerde dayêne mi. Ez hewn ra werişta la hewn vîrê mi de bî. Dima ra mi xo perwerde kerd. Bi serran wina dewam kerd. Ma bar kerd Stenbol. Serranê 90î de karê mêrdeyê mi vera ma demêk Stenbol de mendî. Ma agêrayî Qoser. Mi dest bi xebata cinîyan û partîye kerd. 12 serrî yo ez tewrê Dadîyê Aştîye bîya. Mi verfekîya Dadîyê Aştîye ya Qoserî kerd. 5 serrî mi wezîfe kerd. Mi xebatê meclîsê taxe, TJAye de zî ca girewt.”

 

'Mi xo aver berd’ 

 

Selmaye dîyar kerd ke 48 serrî ya xo de dest bi xêzkerdişê resîmî kerda û vat: “Mi tuta zerrîya xo nêkişt. Coka ra mi zanayêne ke do rojêke aye reyde bêra rî bi rî. Serra 2020î de pandemî ra ver taxa ma de kursê resîmî ameyîne dayîş. Mi qeydê xo viraşt. Ez tena di rojan şîya. Dima ra mi bi bizmar resîm xêz kerd. Dimayê pandemî dest pêkerd. Ma keyeyê xo de mendî. O wext mi xo aver vist. Heta min dêsan ser de zî resîm xêz kerd. Bi wesîleya pandemî mi xo aver vist. Wa cinî xo aver berê. Wa bi cesaret nê. Embazê mi ez xeylê motîve kerda.” 

 

Selma qiseykerdişê xo yê peyênan de bale ant serê sîmgeyê cinîyan û wina peynî kerd: “Ez zêde sîmgeyê cinîyan xêz kena. Şahmeran, Mîlçika Anka xêz kena. No xeylê weşa mi şino. Mi dimayê 48 serrî xeyalê xo pê ard. Merdim bi xeyal û hêvîyan ciwîyeno. Cuye xoverdayîş a. Ganî merdim pey xeyalanê xo ra şêro. Ganî merdim goreyê kesan nêciwîyo.”